Oqýshylardyń oramal tartýyna tyıym salý konstıtýtsııalyq quqyqtyń buzylǵandyǵyn kórsetedi - R. Halmuradov
ASTANA. Jeltoqsannyń 23-i. QazAqparat /Qanat Mámetqazyuly/ - Oqýshylardyń oramal tartýyna tyıym salý konstıtýtsııalyq quqyqtyń buzylǵandyǵyn kórsetedi.
Búgin QR Parlamenti Májilisiniń jalpy otyrysynda Bilim jáne ǵylym mınıstriniń atyna joldanǵan saýalynda depýtat Rozaqul Halmuradov osylaı málim etti, dep habarlaıdy QazAqparat.
«Sońǵy kezderi bilim berý uıymdarynda, joǵary oqý oryndarynda halyqtyń dinı senim bostandyǵyna kepildik berilgen konstıtýtsııalyq quqyqtarynyń júıeli túrde buzylýy oryn alýda. Atap aıtqanda, Bilim jáne ǵylym mınıstriniń mindetin atqarýshy A. Jaqypov myrza, 2009 jylǵy qazannyń 26-syndaǵy haty arqyly oblystyq bilim berý basqarmalaryna, JOO rektorlaryna, respýblıkalyq bilim berý mekemelerinde namaz oqýǵa jáne musylmanshylyq oramaldaryn tartýǵa tyıym salý týraly nusqaýlar jibergen. Mınıstrdiń jeke blogynda da oqýshylarǵa oramal tartýǵa tyıym salynatyndyǵy týraly habarlanypty. Namaz oqý - memlekettik uıymdardyń ishinde namazǵa arnalǵan bólme nemese meshit ashý degendi bildirmeıdi. Óıtkeni, namazdy jumystyń úzilisi kezinde, jumys úderisine kedergi keltirmeı, basqa oryndarda oqýǵa bolady. Al oramal tartý naǵyz hıdjap kııý degen sóz emes, ol burynnan kele jatqan dástúr», dedi depýtat.
Onyń aıtýynsha, qazaq qyzdarynyń oramal tartýyn ana-ájelerdiń salt-dástúrin jalǵastyrý retinde qarastyrý kerek. Namaz oqý, oramal tartý ǵuryptary qoǵamdyq qaýipsizdikke qater tóndiremeıdi, kerisinshe bunyń ımandylyq tárbıelik sıpaty basym.
«Al joǵarydaǵy nusqaýda ata dinimizge qııanat jasalyp otyr. Qazaqstan álemdik dinder sezin uıymdastyrýshy el retinde tanylyp keledi. 2011 jyly Musylman elderi lıgasyna tóraǵalyq etetin bolamyz. Qurban aıtty meıram retinde belgiledik. Endeshe mınıstrliktiń nusqaýlary el saıasatyna qaıshy keledi. Bundaı shetin máselege aıryqsha nazar aýdarý qajet», dedi depýtat.
