Oqýshylardyń mınıstr buıryǵynsyz shetelge shyǵýyna tyıym salynbaq

ASTANA. QazAqparat – Elimizde oqýshylardyń túrli jarystar men baıqaýlarǵa qatysýǵa shetelge barýy úshin mınıstrliktiń buıryǵy qajet bolady. Bul týraly Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Qyrymǵa attanǵan búkil bala aman-saý oraldy. Balalardyń shetelge barýy ata-anasymen kelisilgen, biraq bizben kelisim bolǵan joq. Osyndaı jaǵdaılar qaıtalanbas úshin biz oqýshylardyń shetelge mınıstrliktiń jáne balalar quqyǵyn qorǵaý komıtetiniń buıryǵynsyz shyǵýyna tyıym salmaqpyz. Qyrymdaǵy jaǵdaıdan keıin muǵalim jaýapkershilikke tartyldy», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap bere otyryp.

Eske salsaq, buǵan deıin Oqý-aǵartý mınıstrligi qazaqstandyq oqýshylardyń Qyrymǵa saparyna qatysty túsinik bergen edi.

«Ata-analar bilim mekemesimen baılanyspaı, balalaryn óz betinshe jibergen. Biz kún saıyn balalarmen baılanystamyz. 28 mamyrda olardyń oralýyn asyǵa kútemiz. Búgingi tańda olardyń ómiri men densaýlyǵyna qaýip joq, emotsııalyq jaǵdaıy jaqsy. Óıtkeni, olarmen janynda ata-anasy bar. Oqýshylar bólim boıynsha jıyntyq baǵalaý jáne toqsandyq jıyntyq baǵalaý emtıhandaryn belgilengen keste sheńberinde tapsyra alady. Sondyqtan bul oqý protsesine jáne qorytyndy baǵa alýǵa áser etpeıdi», - degen edi bala quqyqtaryn qorǵaý komıtetiniń basshysy Nasymjan Ospanova OKQ-de ótken brıfıngte.