Oqýshylardyń kólikpen aýdarylýy: Qyz bala BQO aýrýhanasynda kóz jumdy
ORAL. QazAqparat - Batys Qazaqstan oblysynyń Jańaqala aýdanynda mektep oqýshysy jasaǵan jol-kólik apatynan zardap shekken qyz aýrýhanada kóz jumdy, dep habarlaıdy QazAqparat tilshisi.
Budan buryn jazǵanymyzdaı, oqıǵa 20 sáýir kúni keshkisin aýdan ortalyǵy Jańaqala aýyly mańynda boldy.
Aýyldaǵy №3 orta mekteptiń 11-synyp oqýshysy «Lada Largýs» avtokóligin aıdap ketip, synyptastarymen qyzǵaldaq terýge barǵan. Qaıtar jolda rýlge ıe bola almaı, kólik aýdarylyp qalǵan.
Kóliktiń ishinde bolǵan 17 jastaǵy qyz asa aýyr jaraqat alǵan edi.
«Qaladan úsh ret sanavıatsııa shaqyrtyldy. Dárigerler ómirin saqtap qalýǵa qanshama tyrysqanymen, keshe saǵat 16.14-te qyzdyń demi úzildi», - dedi QazAqparat tilshisine oblystyq Densaýlyq saqtaý basqarmasynyń baspasóz hatshysy Aınagúl Saqposynova.
Bul - Jańaqalada oryn alyp otyrǵan birinshi oqıǵa emes. Osydan birneshe jyl buryn júrgizýshi kýáligi joq bozbala avtokóligimen órimdeı úsh qyzdy qaǵyp ketken edi. Sonyń ekeýi ajal qushsa, bireýi aýyr jaraqat alǵan bolatyn.
