Oqýshylardyń qazirgi zamanǵa saı bilim alýlaryna barlyq jaǵdaılar jasalýda - B. Saparbaev (FOTO)
ASTANA. QazAqparat - QR Premer-Mınıstriniń orynbasary Berdibek Saparbaev Astanadaǵy mektepterdiń birinde túlekterdiń «Sońǵy qońyraý» sharasyna qatysty.
«Búgin - Sizderdiń ómirlerińizde tarıhı, erekshe kún. On bir jyl oqyǵan mektepterińizben, ózderińizdiń muǵalimderińizben qoshtasyp, úlken jańa ómirge jol basasyzdar. Abaıdyń sózi bar: «Sen de bir kirpish dúnıege, tetigin tap ta bar qalan». Ata-analaryńyz, muǵalimderińiz, memleket Sizder jaqsy tárbıe men bilim alsyn dep barlyq jaǵdaılar jasaýda. Qazaqstanda Memleket basshysy Nursultan Nazarbaevtyń basshylyǵymen bilimge qandaı jaǵdaı jasalyp jatqanyn ózderińiz bilesizder. Bunyń barlyǵy Sizder basqa memlekettiń azamattary sııaqty qazirgi zamannyń talabyna saı bilim alsyn, erteń barlyqtaryńyz Qazaqstannyń úlken azamattary bolsyn, Qazaqstannyń damýyna óz úlesterin qossyn degen nıetpen jasalyp jatyr. Basqa memleketterde joq «Bolashaq» baǵdarlamasy da sizderge arnalǵan. Sizder qazirgi tańda ózderińizdiń bilimderińizge saı dúnıejúziniń eń myqty degen joǵary oqý oryndarynda memlekettiń esebinen bilim alýǵa múmkindikterińiz bar», - dedi vıtse-premer Astana qalasynyń №3 mektep-gımnazııasynyń saltanatty sharasynda.
Sóz barysynda B. Saparbaev Ulttyq biryńǵaı testileýdiń bıyl ózgeriske ushyraǵanyn da tilge tıek etti.
«Erteń Sizder barlyqtaryńyz Biryńǵaı ulttyq testileýge qatysasyzdar. Bıylǵy jyly oǵan biraz ózgerister engizildi. Bul da Sizderdiń eń birinshi emtıhandaryńyz. Ary qaraı joǵary oqý oryndaryna túsip, Qazaqstannyń damýyna, órkendeýine ózderińizdiń úlesterińizdi qosyńyzdar», - dep túıdi sózin ol.
