Oqýshylardyń 70 paıyzy úıirmelermen qamtylýy qajet - G. Ábdiqalyqova (FOTO)
Oqýshylar saraıyn aralaý kezinde Memlekettik xatshyǵa Qazaqstan Respýblıkasynda balalarǵa qosymsha bilim berýdi damytýdyń strategııalyq tásilderiniń jobasy tanystyryldy. Sonymen qatar "Meniń kásibim" atty kásiptik baǵdarlaý blogynyń jobasy da usynyldy. Ol qazirgi kezde "Qazaqstan temir joly" jáne "Qazatomónerkásip" ulttyq kompanııalarymen yntymaqtastyqta tabysty iske asyrylýda.
"Jyl saıyn osy bilim oshaǵynda 10 myńnan astam bala qosymsha bilim men daǵdy alyp shyǵady. Búginde 2020 jylǵa deıingi Bilim berý baǵdarlamasynyń jobasy jasaqtalýda. Osy baǵdarlamada qosymsha bilim berýge úlken mańyz berilgen. Respýblıka boıynsha 680 myń bala qosymsha bilim alýda. 860-qa taıaý osyndaı Oqýshylar saraılary bar. Biraq ol áli jetkiliksiz dep sanaımyz. Sebebi, balalardyń tek 25 paıyzy qosymsha bilimmen qamtylǵan. Basty maqsat - ony 70 paıyzǵa jetkizý. Bizde mektepterde qosymsha úıirmeler baryn da eskerý kerek. Onda shamamen 1 mıllıon bala daıyndalady. Bundaı jerlerde balalar belgili bir ónerge daǵdylanyp qana qoımaı, bolashaqta tańdaıtyn kásibı mashyqtaryn da damyta alady. Sondyqtan ol másele óte mańyzdy", - dedi G. Ábdiqalyqova.
