Oqýshylardy jazasyn óteýshilermen birge tasymaldaǵan ákim jazalandy
ASTANA. QazAqparat - Ekibastuz qalasyna qarasty Shiderti kentiniń ákimine mektep oqýshylaryn jazasyn óteýshilermen birge tasymaldaǵany úshin qatań sógis berilgen.
Bul týraly búgin óńirlik kommýnıkatsııalar qyzmetinde «Memlekettik qyzmetshilerdiń jumysyndaǵy qyzmettik ádep» taqyrybynda ótken baspasóz máslıhatynda memlekettik qyzmet isteri jáne sybaılas jemqorlyqqa qarsy is-qımyl agenttigi Pavlodar oblysy boıynsha departamenti basshysynyń orynbasary Tynyshtyq Júsipov málim etti, dep habarlaıdy pavlodarnews.kz .
« 26 mamyr kúni tártiptik keńeste memlekettik qyzmetshilerge qatysty úsh fakti qarastyryldy», - deıdi Tynyshtyq Júsipov. «Shiderti kentiniń ákimi óz qol astyndaǵy adamǵa shaǵyn avtobýstyń júrgizýshisin zańsyz qabyldaý týraly tapsyrma bergen. Nátıjesinde oqýshylardy tasymaldaýdy tıisti deńgeıde uıymdastyrmaǵan. Sonymen qatar, Baıanaýyl aýyldyq okrýginiń ákimi qyzmettik kólikti paıdalanǵan, aýyldasyn balaǵattaǵan. Onyń buǵan deıin tártiptik jaýapkershilikke tartylǵanyn eskere otyryp, laýazymynan tómendetý týraly usynys jiberildi. Memlekettik satyp alý týraly erejelerdi saqtamaǵan Ekibastuz qalasy ákimdigi ekonomıka jáne bıýdjettik josparlaý bóliminiń basshysyna qatań sógis berý usynyldy. Ertis aýdany Severnyı aýyldyq okrýginiń ákimi qylmystyq jazaǵa tartylatyn is-áreketke jol berip, aýyl turǵynynyń densaýlyǵyna qasaqana zııan kelitirgen ári qorlaǵan. Ol aýdan ákiminiń úkimimen jumystan bosatyldy. Budan basqa, Pavlodar-Omby tas jolynda quıǵytqan Jelezın aýdany aýyl sharýashylyǵy jáne kásipkerlik bóliminiń basshysyn jergilikti polıtsııa qyzmeti men jol kólik polıtsııasy toqtatyp, 10 AEK kóleminde aıyppul saldy jáne kóligi aıyppul turaǵyna jetkizildi. Sondaı-aq, Pavlodarda túngi saǵat 1.15-te Pavlodar aýdany ákimdigi «Kommýnservıs» JShS-ne tıesili avtokólik toqtatylǵan. Bul rette, júrgizýshi memlekettik qyzmetshi bolmaǵandyqtan, jumys berýshi jaýapkershilikke tartylady. Tynyshtyq Júsipovtiń aıtýynsha, Pavlodar oblysynda bıyl ádep jónindegi keńeste tártip buzýshylyq boıynsha 19 fakti, memlekettik qyzmetshiniń bedelin túsirý boıynsha úsh fakti qarastyrylǵan. Nátıjesinde tártiptik keńestiń usynysy boıynsha memlekettik organdardyń basshylarymen sógis jarııalaý, jumystan bosatý jáne qyzmetinen tómendetý túrinde 11 adamǵa jaza qoldanylǵan.
