Oqýshylardy tegin tamaqtandyrýǵa bólingen qarajat shyǵyndy aqtamaıdy - Almaty kásipkerleri
Kezdesýde aıtylǵandaı, 1 qyrkúıekten Almatyda bastaýysh synyp oqýshylaryn tegin tamaqtandyrý jobasy bastaldy. Kásipkerler bir balany ystyq tamaqpen qamtý quny kúnine 560 teńge dep eseptelgenin alǵa tartyp, bul qarajattyń shyǵyndy aqtamaıtynyn aıtady.
«Alaıda, búgingi kúni bul qarajat tek azyq-túlik alýǵa ǵana jetedi, ıaǵnı as ázirleýshilerdiń eńbegi men tamaq daıyndaýǵa ketetin shyǵyndy aqtamaıdy. Pandemııadan keıin kásipkerler balalardy azyq-túlikpen qamtamasyz etý boıynsha óz mindettemelerin oryndaý úshin nesıe alady. Aldyn ala qarajat bólý (avans) máselesin qarastyrýǵa bola ma?» - dep surady ákimnen kásipkerler.
Erbolat Dosaev jaýapty qurylymdar bıýdjetti qalyptastyrǵan kezde naryqtaǵy baǵaǵa nazar aýdarǵanyn atap ótti. Alaıda, ol sáýir aıynda bolǵan.
«1 qyrkúıekten bastap qalamyzda alǵash ret bastaýysh synyp oqýshylary tegin tamaqpen qamtyldy. Men muny jarııalaǵan kezde, bıznesmender júktemeniń salmaqty bolatynyn túsinýi kerek dep oıladym. Jaýapty qurylymdar bıýdjetti qalyptastyrýda naryqtaǵy baǵany eskerdi. Alaıda, sizdiń suraǵyńyz oryndy, óıtkeni bul baǵalaýlar sáýir aıynda júrgizilgen. Kelesi jyldyń bıýdjetin qalyptastyrý kezinde avanstyq tólem máselesin zerttep, qarastyramyz», - dep jaýap berdi ákim.
Eske salsaq, bıyl oqý-aǵartý mınıstrligi pılottyq jobalardy qolǵa aldy. Olar – mektep avtobýsy jáne oqýshylardy ystyq tamaqpen qamtý. «Bilimdi ult: bilimge umtylý, eńbeksúıgishtik jáne patrıotızm» atty forýmda mınıstr Ashat Aımaǵambetov bul jobalardyń Almatyda bastalatynyn aıtqan edi.
