Oqýshylardy mektepke tasymaldaýdaǵy zańsyzdyqtar úshin 53 laýazymdy tulǵa jazalandy

KÓKShETAÝ. QazAqparat – Aqmola oblysynda balalardy mektepterge avtobýspen tasymaldaý kezinde zań buzýshylyqtarǵa jol bergen laýazymdy tulǵalar jaýapqa tartyldy, dep habarlaıdy QazAqparat tilshisi.

Aqmola oblysynyń prokýratýrasy balalardy jalpy bilim beretin mektepterge avtobýstarmen tasymaldaý kezinde qaýipsizdik erejeleriniń saqtalýyna taldaý júrgizdi.

Vedomstvonyń baspasóz qyzmetinen málim etkendeı, tekseris kezinde kólik quraldaryn basqarý quqyǵy joq, sondaı-aq júrgizýshi kýáliginiń tıisti sanaty bolmaǵan júrgizýshilerdiń mektep avtobýstarymen balalardy tasymaldaǵany anyqtaldy.

«Budan bólek, kólik quraldarynyń júrgizýshileri mindetti reıs aldynda jáne reısten keıin medıtsınalyq tekserýden ótkizilip turmaǵany, mektep avtobýstaryn órt sóndirgishtermen jáne alǵashqy medıtsınalyq kómek kórsetý qobdıshalarymen jabdyqtalmaǵany belgili boldy. Osylaısha, balalardyń ómiri men densaýlyǵyna qaýp tóndirilgen», - dedi mekemeden.

Prokýrorlardyń aktileri boıynsha oblys mektepteri men aýdandyq bilim bólimderiniń 53 laýazymdy tulǵasy tártiptik jaýapkershilikke jáne 10 avtobýs júrgizýshisi ákimshilik jazaǵa tartyldy.

«Kórsetilgen salada anyqtalǵan zań buzýshylyqtar joıyldy, mektep avtobýstarynyń júrgizýshilerine jáne kólik quraldaryna qoıylatyn talaptar normaǵa sáıkes keltirildi», - dep túıindedi prokýratýradan.