Oqýshylardy qaqqan tramvaı júrgizýshisiniń advokaty Pavlodar sotyna shaǵym túsirdi
PAVLODAR. QazAqparat - Pavlodarda eki qyzdy qaǵyp ketken tramvaı júrgizýshisi Natalıa Peknıchtiń advokaty sotqa apellıatsııalyq shaǵym túsirdi, dep habarlaıdy «QazAqparat» HAA tilshisi.
«Peknıchtiń advokatynan apellıatsııalyq shaǵym tústi, - dep málimdedi Pavlodar oblystyq sotyndaǵylar. - Úkimdi ózgertýdi surap, bas bostandyǵyn aıyrmaýǵa baılanysty jaza taǵaıyndaý nemese jazasyn óteýdi keıinge qaldyrý týraly ótinish bildirdi».
Eske sala keteıik, jantúrshigerlik jol apaty 7 qyrkúıek kúni bolǵan. Tramvaı rettelmeıtin jaıaý júrginshiler ótkelinen ótip bara jatqan eki qyzdy qaǵyp ketken. Saldarynan olardyń úlkeni - Mahabbat oqıǵa ornynda kóz jumdy. Shynar Ýálıtovanyń balalaryn jalǵyz ózi ósirip otyrǵanyn bilgen pavlodarlyq «Eriktiler klýby» men oblystyq bilim salasynyń qyzmetkerleri qaıyrymdylyq sharasyn uıymdastyrdy. Halyqtyń jınalǵan qarjysyna zardap shekken otbasyǵa Ekibastuz qalasynan úsh bólmeli páter satyp alynyp, qajetti jıhazdary jetkizildi. Al, eki mıllıonnan astam jınalǵan teńgeni Shynar shuǵyl otaǵa muqtaj balalardyń otbasyna aýdaryp berdi.
Qylmystyq ister jónindegi Pavlodar qalasynyń №2 soty tramvaı júrgizýshisin QR QK-niń 345-baby, úshinshi bóligi boıynsha kináli dep taýyp, kólik basqarýmen baılanysty qyzmetpen aınalysý quqyǵynan bes jylǵa aıyrý jáne qonys kolonııasynda bas bostandyǵyna shekteý qoıý túrinde jaza taǵaıyndalǵan edi.
Sottaǵy sońǵy sózinde vagon júrgizýshisi qyzdyń ólimi úshin anasynan taǵy bir márte keshirim surap, bostandyǵynan aıyrmaýdy jáne óziniń alty jasar qyzyn tárbıeleýge múmkindik berýdi ótingen bolatyn.
