Oqýshylar jaýyngerlik tapsyrmalardy oryndaıtyn robottar qurastyrdy (FOTO)

ASTANA. QazAqparat - Shymkentte oqýshylardyń qoldaǵy bar materıaldardan jınaǵan erekshe robot tehnıkalaryna arnalǵan kórme ótti, dep habarlaıdy Qorǵanys mınıstrliginiń baspasóz qyzmeti.

Jobalar jarylǵysh qurylǵylardy zalalsyzdandyrýdan bastap radıobelsendi qaldyqtardy tasymaldaýǵa deıingi jaýyngerlik tapsyrmalardy oryndaý maqsatynda qurastyrylǵan.

Oqýshy ınjenerler bolashaqta áskerılerdiń qaýipsizdigin qamtamasyz etetin tehnıkany jasaýmen aınalysqysy keletinderin málim etti.

Robottar kórmesi ІІ Ońtústik Qazaqstan «Aıbyn» áskerı-patrıottyq jastar jıyny sheńberinde ótkizildi. Onda oblystaǵy barlyq aýdandarynan 18 komanda baq synasty. Saıystyń ashylǵany týraly QR Qorǵanys mınıstriniń orynbasary  general-maıor Talǵat Muhtarov habarlady.

35748 áskerı bólimi orkestriniń súıemeldeýimen komandalar stadıonda marshpen júrip ótip, áskerı doda bastaldy. Qajymuqan Muńaıtpasov atyndaǵy ortalyq stadıonda óńirdiń oqýshylary sporttyń 11 áskerı-qoldanbaly túri boıynsha ózderiniń jetistikterin kórsetti. Olardyń arasynda Kalashnıkov avtomatyn bólshektep, qurastyrý, beltemirge tartylý, ornynda turyp uzyndyqqa sekirý, serippedegi kúshtik jattyǵýlar, bulshyq etti qataıtý, jalpyáskerı qorǵanys kostıýmin jedel kııý, bastapqy medıtsınalyq kómek kórsetý jáne qyz balalarǵa arnalǵan kúshtik jattyǵýlar kesheni boldy. 

Aralarynda qyzdar da bar mektepterdiń 216 oqýshysy naǵyz saıysta kúsh synasty. Ońtústik Qazaqstan oblysynyń qorǵanys isteri jónindegi departamentiniń habarlaýynsha, qatysýshylar naǵyz áskerı qyzmetshilerge tán nátıjeler kórsetti. Qorytyndyda sporttyń 6 áskerı-qoldanbaly túrinde birinshi oryndy ıelengen Arys qalasynyń komandasy jeńimpaz atandy. Ekinshi oryndy Kentaý qalasynyń oqýshylary enshiledi. 1 upaı aıyrmashylyqpen Túrkistan qalasynyń oqýshylary úshinshi orynǵa turaqtady. Ár atalymda jeńimpazdarǵa kýboktar, gramotalar jáne baǵaly syılyqtar tabys etildi.