Oqýshylar úshin on mınýttyq 3,3 myń vıdeo sabaq túsiriledi
NUR-SULTAN. QazAqparat – 6 sáýirden bastap 3 mıllıonnan astam mektep oqýshycy qashyqtan oqý formatyna kóshedi. Bul týraly Ortalyq kommýnıkatsııalar qyzmetiniń alańynda ótken mektep oqýshylarynyń ІV toqsanda qashyqtan oqý júıesine arnalǵan onlaın konferentsııada aıtyldy, dep habarlaıdy QazAqparat tilshisi.
«6 sáýirden bastap 3 mıllıonnan astam mektep oqýshylary qashyqtan oqý formatyna kóshedi. ІV toqsanǵa qatysty jumysymyzdy ótkizdik. Suraqtar da, syn-pikirler de, qoldaý da bar. Qashyqtan oqý elimizde tórt tetik boıynsha júrgiziletin bolady. Birinshi, telearnalar arqyly sabaq júrgizemiz. Bul «Balapan», «El arna» telearnasy. Sabaq bireýinde qazaqsha, ekinshisinde orys tilinde júrgiziledi. Kúnine 8 saǵattan efırdi alyp otyrmyz. Jalpy keste daıyn. Kesteni buqaralyq aqparat quraldaryna berip, ata-ana, ustaz, mektepterge taratýdamyz. Ár vıdeo sabaq 10 mınýtqa sozylady. Búginge deıin 500-ge jýyq vıdeo sabaq túsirildi. Jalpy vıdeo sabaqtardyń sany 3 360 bolady. Barlyq eń basty pánder qamtylady«, - deıdi QR Bilim jáne ǵylym mınıstri Ashat Aımaǵambetov.
Onyń aıtýynsha, telearnalar arqyly beriletin vırtýaldy tapsyrmalar boıynsha balalar kitaptar, oqýlyqtar jáne basqa da aıtylǵan quraldar boıynsha jumys júrgizetin bolady.
«Muǵalimder oqýshylarmen keri baılanys ornatatyn bolady. Bul tetik boıynsha basty qural retinde ınterneti joq oqýshylar oqıdy. Ony qosymsha retinde de qoldanýǵa bolady. Barlyq túsirilgen 3360 vıdeo sabaqty mindetti túrde ınternetke salamyz. Interneti bar oqýshylar ony kerek ýaqytynda qarap, ony qaıtalap, qajet jerinde toqtatý múmkindigine ıe bolady dep josparlap otyrmyz», - deıdi ol.
