Oqýshylar úshin 2 myńnan astam tele-sabaq daıyndalady - Sholpan Karınova
NUR-SULTAN. QazAqparat - Elimizde qashyqtyqtan oqytý júıesin uıymdastyrýdy jobalaý keńsesi qurylýda. Bul jaıynda QR Bilim jáne ǵylym mınıstri Sholpan Karınova Facebook paraqshasynda jazdy, dep habarlaıdy QazAqparat tilshisi.
Onyń atap ótýinshe, Bilim jáne ǵylym mınıstrliginde, aımaqtyq bilim berý basqarmalarynda Qashyqtyqtan oqytý júıesin uıymdastyrý boıynsha jobalaý keńsesi qurylyp otyr. Bul rette indet kezeńinde oqý úrdisin uıymdastyrý boıynsha ýaqytsha sharalar engizgen kórshiles elderdiń tájirıbesi, halyqaralyq tájirıbe zerdelendi. Mektepter men ustazdar úshin tıisti usynymdar daıyndaldy. Ustazdar úshin arnaıy onlaın, tele-kýrstar, vebınarlar ázirlendi.
«Buǵan qosa, ustazdar men balalarǵa «Balapan« jáne «El Arna« telearnalarynda tórtinshi toqsan bastalysymen kúnde 1-11 synyp oqýshylaryna aptasyna bes kún sabaq ótkiziledi. Qazir osy tele-sabaqtardyń arnaıy túsirilimi júrgizilýde. Ol sabaqtar memlekettik standart talaptaryna, oqý baǵdarlamalaryna sáıkes qurylǵan. Oqýshylar úshin 2 myńnan astam tele-sabaq daıyndalady. Buǵan úlken kúsh jumsalýda», - dedi vıtse-mınıstr.
Onyń atap ótýinshe, tele-sabaq barysynda Nur-Sultan qalasynyń, Nazarbaev Zııatkelik mektepteriniń, respýblıkalyq, halyqaralyq jáne jeke mektepterdiń úzdik ustazdary elimizdiń barlyq balalaryna sabaq beredi.
«Ustazdarǵa tek qoldaý qajet. Ustazdar men oqýshylarǵa bilim áleminde jańa asýlardy meńgerý jolynda tabys tileımiz», -dedi Sholpan Karınova.
