Oqýshylar tóbelesi: Mektep dırektory men orynbasary jumystan ketti
AQTÓBE. QazAqparat - Aqtóbede daryndy mektep-ınternatynyń oqýshylary tóbeleskennen keıin, mektep dırektory, tárbıe isi jónindegi orynbasary men psıholog jumystan shyǵaryldy, dep habarlaıdy QazAqparat tilshisi.
M. Qusaıynov atyndaǵy daryndy balalarǵa arnalǵan mektep-ınternatta oqýshylar tóbelesip, biri ekinshisine pyshaq suǵyp alǵan bolatyn. Keıin oblystyq bilim basqarmasynyń basshysy Lázzat Orazbaeva mektep dırektorynyń jumystan shyǵarylǵanyn málimdegen edi.
«Joǵary synyp oqýshylarynyń arasyndaǵy oqıǵadan keıin mektep-ınternatta tekserý júrgizildi. Jumys tobynyń músheleri oqý ornyndaǵy tárbıe protsesi tıisti deńgeıde uıymdastyrylmaǵanyn jáne ákimshilik taraptan baqylaý nasharlaǵanyn anyqtady. Tekserý nátıjesi boıynsha mektep-ınternat dırektory G.Tájiǵalıeva óz erkimen jumystan shyǵarylyp, tárbıe isi jónindegi orynbasary men pedagog-psıholog qyzmetterinen bosatyldy. Al dırektordyń oqý isi jónindegi orynbasary men tárbıeshi eskertý alsa, 10 synyptyń jetekshisine qatań sógis jarııalandy. Osy fakti boıynsha ishki ister organdary tergeý jumystaryn bastady. Pyshaq jaraqatyn salǵan oqýshy eshqaıda ketpeý týraly qolhatpen júr», - dep habarlady óńirlik kommýnıkatsııa qyzmeti.
Aıta keteıik, pyshaq jaraqatyn alǵan oqýshy úıinde emin jalǵastyryp jatyr.
