Oqýshylar tóbelesi: Aqtóbe mektepterinde arnaıy kúzet qyzmeti jumys isteıdi
AQTÓBE. QazAqparat - Oqýshylar men stýdentter arasyndaǵy tóbelesten soń qalada reıd kúsheıip, ata-analar jaýapqa tartylyp jatyr. Aqtóbe qalasynyń ákimi Іlııas Ispanov mektepterde arnaıy kúzet qyzmeti jumysqa kirisetinin aıtty, dep habarlaıdy QazAqparat tilshisi.
Aqtóbede mektep oqýshylary arasyndaǵy qylmys jıi tirkele bastady. Aıta keteıik, 29 qańtar kúni stýdentter tóbelesip, bireýi pyshaq jaraqatymen aýrýhanaǵa tústi.
Al Shalqar aýdanynda oqýshylar tóbelesip, oqýshy kóz jumdy.
Endi mektepterde arnaıy kúzet qyzmeti jumys istep, oqýshylar tekseriledi. Olardan tyıym salynǵan zattar anyqtalsa, dereý polıtsııa shaqyrylady.
«Aqtóbe qalasynda, óńirde, Qazaqstannyń birneshe aımaǵynda balalar topqa bólinip, tóbelesti. Qalada kolledj stýdentteri, mektep oqýshylary men stýdentter tóbelesti. Barlyq qylmys egjeı-tegjeı tekserilip jatyr. Birinshiden, kúdiktiler ustaldy, zań aıasynda qatań shara qoldanylady. Ekinshiden, qazir top bolyp júretin balalar baqylaýǵa alyndy. Tóbeleske beıim balalar mektepten-aq belgili. Mektep ınspektorlary, bilim bólimi jumys atqaryp jatyr, jedel top quryldy. Sabaqqa kelmeıtin, úlgerimi nashar balalar tizimge alyndy. Mektepishilik, mekteparalyq jáne polıtsııa departamentinde óz tizimi jasaldy. Ár ata-ana balasy úshin jaýapty. Mektep ishinde muǵalim qaraýy tıis. Búginge deıin mektepterde arnaıy kúzet qyzmeti bolmady. Endi bilim ordalaryn arnaıy lıtsenzııasy bar kúzet qyzmeti baqylaýǵa alatyn bolady. Sebebi, oqýshylar mektepke tyıym salynǵan zattardy alyp kelýi múmkin. Tekserý bolady, eger tyıym salynǵan zat anyqtalsa, ishki ister organdary shaqyrylady», - dedi qala ákimi Іlııas Ispanov.
