Oqýshylar saraıyn Ǵanı Muratbaev esimimen ataý jóninde bastama kóterildi
ASTANA. 15 maýsym. QazAqparat - Ortalyq Azııa men Qazaqstandaǵy jastar qozǵalystaryn uıymdastyrýshylardyń biri, Qazaqstan Jastar odaǵynyń jetekshisi ári alǵashqy komsomol Ǵanı Muratbaevtyń týǵanyna bıyl 110 jyl tolyp otyr.
Osyǵan oraı Oqýshylar saraıynda «Ǵanı - jaryq juldyz» taqyrybynda saltanatty jıyn ótti, dep jazady «Almaty aqshamy» gazeti.
Patrıottyq tárbıe maqsatynda «Urpaq jalǵastyǵy» baǵdarlamasy aıasynda uıymdastyrylǵan sharaǵa elge belgili azamattar men qaıratkerdiń týystary, Oqýshylar saraıynyń basshylary jáne «Jas Ulan» jastar uıymynyń ókilderi qatysty.
Aldymen, Oqýshylar saraıynyń aldyndaǵy Ǵanı Muratbaevtyń eskertkishine saltanatty rásimmen gúl qoıyldy. Ómirden jastaı ketken Alash jastarynyń kóshbasshysyn jıylǵandar bir mınýt únsizdikpen eske alyp, keıin saraıdyń úlken kontsert zalyna oıysty. Onda Ǵanı Muratbaevtyń beınesi túsken jalǵyz shaǵyn derekti fılm kórsetildi. Jıynǵa qoǵam qaıratkerleri - general-maıor Zaqash Qamalıdenuly, fılosofııa ǵylymdarynyń doktory Saǵyndyq Kenjebaev, fılologııa ǵylymdarynyń doktory Tynysbek Qońyratbaı, Oqýshylar saraıynyń dırektory Qýatbek Turysbekov qatysyp, sóz sóıledi.
- Jastarymyzǵa úlgi bolar kósemdi eshýaqytta umytpaýymyz kerek, - degen Zaqash Qamalıdenuly Vagankovtaǵy Ǵanı Muratbaevtyń denesi jerlengen jerde túsirilgen sýretter men «ómir joldary» atty estelik kitabyn usyndy. Nebári 23 jyl ǵana ǵumyrynda eline, jerine ólsheýsiz eńbek etken Ǵanı Muratbaevtyń júrip ótken joly jıynǵa qatysýshylar arasynda keńinen sóz boldy.
- Jastyǵyna qaramastan kóptegen bedeldi qyzmetterdi atqarǵan komsomol uıymdastyrýshysyn biz umyt qaldyrmaýǵa tıispiz. Ǵanı Muratbaevtyń 110 jyldyǵyn jasóspirimderdiń boıynda patrıottyq sezim qalyptassyn degen nıetpen uıymdastyryp otyrmyz, - dedi Oqýshylar saraıynyń dırektory Qýatbek Turysbekov.
Qazirgi Oqýshylar saraıyna Ǵanı Muratbaevtyń esimin berý týraly bastama da osy jıynda tilge tıek boldy. Shynymen de, Oqýshylar saraıy Qyzylorda oblysynyń Qazaly aýdanynan shyqqan, 23 jasynda búkil Odaqqa belgili bolyp, artynda óshpes iz qaldyrǵan Ǵanı Muratbaevtyń esimin ıelenip jatsa, janynda ornalasqan eskertkishi de ǵımaratqa ár berip turar edi.
