Oqýshylar rýhanı jaǵynan damýy qajet – Prezıdent qos mınıstrlikke tapsyrma júktedi

ASTANA. QazAqparat – Túrkistanda ótip jatqan Ulttyq quryltaıda Prezıdent Qasym-Jomart Toqaev oqýshylardyń rýhanı damýyna tolyq jaǵdaı jasalýy qajet ekenin aıtty, dep habarlaıdy QazAqparat tilshisi.

«Sonymen birge balalarǵa ekologııalyq tárbıe berý mańyzdy. Olardy tabıǵatqa janashyrlyqpen qaraýǵa úıretken jón. Mádenı muralarymyzdy tanyp-bilýge, qorǵaýǵa daǵdylandyrý kerek. Oqýshylar teatrǵa, murajaıǵa jáne tarıhı oryndarǵa jıi baryp, rýhanı jaǵynan damýy qajet. Mundaı sharýa búkil elimiz boıynsha turaqty túrde júrgizilýi qajet. Oqý-aǵartý mınıstrligi men Mádenıet jáne sport mınıstrligi osy máselemen birlesip shuǵyldanýy kerek», - dedi Prezıdent.

Sondaı-aq Memleket basshysy óskeleń urpaqty eńbekqorlyqqa, bıznes júrgizý sheberligine baýlý máselesi nazardan tys qalmaý kerektigin atap ótti.

«Men urpaqty eńbekqorlyqqa, bıznes júrgizý sheberligine baýlý máselesi jóninde únemi aıtyp júrmin. Máselen, keıbir kórshi elderdiń jastary shetelderge baryp, belsendi túrde kásippen aınalysady, dúken ashady, ulttyq taǵamdaryn dáripteıdi, qysqasy, nápaqasyn tabady. Osyndaı áreketterden bizdiń jastarymyz da úlgi alsa, jaman bolmaıdy. Árıne, bul – elden ketip, eńbek et degen sóz emes, bul – eń bastysy, eńbektiń jaqsy-jamany joq degen sóz.

Ár máseleni ábden saıasılandyryp, bos sóz qýmaı, qol qýsyryp qarap otyra bermeı, naqty jumyspen, qarajat ákeletin zańdy ispen shuǵyldaný kerek degen sóz. Men byltyrǵy Quryltaıda urpaqty eńbekke baýlýǵa qatysty birqatar tapsyrma berdim. Sonyń negizinde mektepterge eńbek sabaǵy qaıtaryldy. Osy baǵyttaǵy jumysty odan ári jalǵastyrýymyz kerek. Sondaı-aq, biz el bolyp qarapaıym eńbek adamyn qadirleı bilýimiz qajet», - dep málim etti Qasym-Jomart Toqaev.

Eske salaı keteıik, búgin Túrkistanda Memleket basshysynyń qatysýymen Ulttyq quryltaıdyń ekinshi otyrysy ótip jatyr.