Oqýshylar mýzeı men teatrlarǵa júıeli túrde baratyn bolady - ShQO ákimi
Shyǵys Qazaqstan oblysynda 10 aımaqtyq mýzeı, sondaı-aq onyń 5 bólimi jumys isteıdi. Basty maqsaty - aımaqtyń tarıhı, mádenı muralaryn saqtaý, zertteý jáne taratý. 2017 jyly óńirde 400-den asa mádenı is-shara uıymdastyrylyp, teatr tarlandarymen 585 saxnalyq kórinis qoıyldy. Oblys teatrlary men mýzeıleriniń jumysy qanshalyqty tıimdi bolsa da, oblys ákimi oqýshylardyń sol mádenı mekemelerge kóp kele bermeıtinin qatań synǵa aldy.
- Mektep oqýshylary aımaqtyń mýzeı men teatrlaryna júıeli túrde baryp turýlary qajet. Tarıh, geografııa, bıologııa jáne mádenıettaný sabaqtaryn ótkizý úshin mýzeılerdi paıdalaný týraly baǵdarlama daıyndaýdy tapsyramyn. Sonymen qatar, oqýshylardyń qoıylymdarǵa barýyna jaǵdaı jasap, qosymsha qarjy bóleıik, - dedi Danıal Ahmetov.- Óıtkeni barlyq memlekettik baǵdarlamalar jastarǵa baǵyttalǵan jáne bul balalarymyzǵa bizdiń mádenı muramyzben tanysýǵa múmkindik beredi.
2017 jyly óńirde alty joba «Rýhanı jańǵyrý» baǵdarlamasy aıasynda bastaý aldy. Atap aıtqanda, «Kıeli geografııa», «Jahandaný álemindegi qazirgi Qazaqstan mádenıeti»,«Týǵan jer» jáne basqa da jobalar ulttyq biregeılikti jáne jańa qazaqstandyq patrıotızmdi nasıhattaý maqsatynda júzege asyrylyp keledi.
- Qoǵamnyń rýhanı damýyna erekshe nazar aýdarý qajet. Al «Rýhanı jańǵyrý» baǵdarlamasy osy bóliktiń negizi bolyp sanalady. Bul memlekettik baǵdarlamanyń máni barlyq buqaralyq aqparat quraldarynda laıyqty jarııalanýy kerek. Bul baǵytta júrgiziletin árbir jumys árbir azamat úshin anyq bolýy tıis, - dep atap ótti oblys ákimi.
Aıta ketý kerek, Shyǵys Qazaqstanda arheologııalyq zertteýler jalǵasyn tabýda. Bul rette aımaq basshysy Danıal Axmetov arheologııalyq zertteýlerge oqýshylardy qatystyrý týrasynda tıisti baǵdarlamalardy daıyndaýdy buıyrdy.
