Oqýshylar men stýdentterge kásipkerlik negizin oqytqan durys - Darıǵa Nazarbaeva
ASTANA. QazAqparat - Stýdentterge arnalǵan úzdik bıznes jobalarǵa baıqaýlar ótkizý kerek. Bul týraly búgin «Áıelder kásipkerligin damytýǵa arnalǵan jańa múmkindikter» atty halyqaralyq bıznes-konferentsııada QR Parlamenti Senatynyń depýtaty Darıǵa Nazarbaeva málim etti.
«Búginde shyn máninde kásipkerlikke erekshe ekpin qoıylýda jáne iskerliktegi basymdyqtardan árbir qazaqstandyq habardar bolýy tıis. 18 mıllıon halyqtyń arasynda 8,5 mıllıony belsendi jumys isteıdi. Bul óz kezeginde árbir eńbek etetin adamǵa shamamen jumys istemeıtin eki adamdy asyraý kerektigin bildiredi. Osy turǵyda bıýdjetke júkteme arta beredi, al memlekettik bıýdjettiń de óziniń shegi bar. Sondyqtan da Prezıdent bıznesti qoldaý kerektigin, ekonomıkada memlekettiń úlesin qysqartýdy jáne ony jekemenshikke berý jaıynda aıtyp júr. Bul qadam tabysqa jetýdiń eń durys joly. Balalardy erte kezden bilimin shyńdaýǵa, iskerlikte ózderine senimdi bolýyna baýlý kerek», - dedi senator.
Onyń paıymynsha, Qazaqstanda joǵary synyp oqýshylary men kolledj stýdentteri úshin kásipkerlik negizi boıynsha oqý baǵdarlamalaryn engizý qajet. Sonymen qatar mektep jáne stýdenttik komandalaryn quryp, úzdik bıznes jobalarǵa oblystyq ári respýblıkalyq baıqaýlar ótkizý kerek. Bul turǵyda jeńimpaz atanǵandarǵa jobalardy iske asyrý úshin granttar bólgen durys.
«Árbir túlek bıznes jobany daıarlaýǵa jáne ony qorǵaýǵa qaýqarly bolýy tıis», - dep túıindedi sózin Darıǵa Nazarbaeva.
