Oqýshylar qysta da dalada fýtbol oınaı beretin bolady - Áset Isekeshev
ASTANA. QazAqparat - Astana qalasynyń ákimi Áset Isekeshev jabyq sport alańdaryn salý jospary jaıynda aıtyp berdi , dep xabarlaıdy QazAqparat tilshisi.
«Búginde Astana «Salaýatty qalalar» atty xalyqaralyq jobaǵa qatysyp keledi. Osyǵan oraı, memlekettik-jekeshelik seriktestik negizinde jabyq sport alańdaryn salý jumystary atqarylýda. Bárimiz jaqsy bilemiz, bizdiń klımatymyz sondaı, biraz ýaqyt sýyq bolyp turady. Sol sebepti biz mektepterdiń janyndaǵy sport alańdaryn jaýyp tastaýdy josparlap otyrmyz. Osynyń arqasynda mektep oqýshylary qysta da sportpen aınalysa alady», - dedi Á.Isekeshev bilim basqarmasynyń uıymdastyrýymen ótken Tamyz konferentsııasynda.
Ákimniń aıtýynsha, bıyl 59-shy mekteptiń janynan pılottyq negizde bir jabyq sport alańy ashyldy. Jaqyn arada taǵy 30 mektep boıynsha konkýrs jarııalanady. Sonyń qorytyndysy boıynsha atalǵan mektepterde de jabyq sport alańdary salynady.
«Qazirgi kezde basqa qalalarda bir mektepke shamamen 800-1500 oqýshy keledi. Al elordada atalǵan kórsetkish 1500-ge jetip otyr. Aldaǵy bes jylda Astanaǵa taǵy 120 myńnan astam oqýshy keledi degen boljam bar. 2011 jyly elorda mektepterinde 75 myń oqýshy oqysa, byltyr atalǵan kórsetkish 140 myńǵa jetti. Bıyl 155 myń oqýshy bolady dep otyrmyz. Osyǵan baılanysty aldaǵy bes jylda memlekettik bıýdjettiń esebinen 24 mektep salynady», - dep atap kórsetti Á.Isekeshev.
