Oqýshylar IV toqsannyń jıyntyq baǵalaýyn qashan tapsyrady

NUR-SULTAN. QazAqparat - QR BǴM Mektepke deıingi jáne orta bilim komıtetiniń tóraǵasy Maıra Meldebekova oqýshylar IV toqsannyń jıyntyq baǵalaýyn (TJB) qashan tapsyratynyn aıtty, dep habarlaıdy QazAqparat tilshisi.

«Bólim boıynsha jıyntyq baǵalaý (BJB) ótkizý merzimi aptasyna 2 jáne odan kóp saǵatty quraıtyn pánder boıynsha 4-11 mamyr aralyǵynda ótedi. Jalpy, biz munyń aldynda Bilim jáne ǵylym mınıstrliginiń №135 buıryǵynda 4-8 mamyr dep belgilegen edik. Qazir merekelik datalarǵa sáıkes kelýine baılanysty 11 mamyrǵa deıin uzarttyq. Aptasyna bir saǵatty quraıtyn oqý pánderi boıynsha 11-15 mamyr aralyǵynda jáne 1-10 synyptarda toqsandyq baqylaý, sonymen qatar 11-synyptarda baqylaý jumysy 18-22 mamyr aralyǵynda ótedi. Jalpy, BJB jáne TJB tapsyrmalarynyń barlyǵyn muǵalimder ózderi ótken taqyryp boıynsha daıyndaıdy», - dedi Maıra Meldebekova onlaın-suhbat barysynda.

Onyń aıtýynsha, oqý pánderi boıynsha 1-10 synyptarda júrgiziletin jıyntyq baqylaý kestesin árbir bilim berý uıymy jeke daıyndaıdy.

«BJB ótkizý ýaqytyn 20 mınýt, TJB ýaqytyn 40 mınýt dep belgilep otyrmyz. Sonymen qatar 1-4 synyp oqýshylarymyz jas erekshelikterine qaraı, tehnologııalardy áli de tolyq meńgermeýine baılanysty ýaqyt shektelmeıdi. Ata-analarǵa da, oqýshylarǵa da aıtarymyz, qazirgi sabaq barysy, qashyqtan oqytý júıesi qalaı ótip jatsa, BJB da, TJB da solaı ótedi», - dedi komıtet tóraǵasy.