Oqýshylar gadjetti muǵalimderden artyq biledi - Baqytjan Saǵyntaev
«Biz munda aqparattandyrý týraly kóp aıtamyz. Elimizdegi mektep baǵdarlamasyna qarasaq, aqparattandyrýdy meńgerý jetinshi synypta bastalady. Báriniń balasy bar, nemeresi bar. Baıqasańyzdar, olar eki jasynda-aq, iPad-pen otyrady. Al biz olardy jetinshi synypta ǵana oqyta bastaımyz. Jetinshi synypta olar muǵalimderinen artyq bilip otyrady. Sondyqtan, tutas júıeni aýystyrýymyz qajet. Bul ortany ózgertpeıinshe, eshqandaı tabysqa jetpeımiz», - dep atap ótti Baqytjan Saǵyntaev «Atameken» ulttyq kásipkerler palatasynyń ІV Sezinde.
Úkimet basshysynyń aıtýynsha, ol úshin damyǵan elderdiń tájirıbesin zertteý kerek.
«Biz halyqaralyq tájirıbeni, Kremnıı alqabyn zerttep jatyrmyz. Belarýs pen Qazan tehnoparkterin muqııat zerdeledik. Qazir ózimizde post-EXPO negizinde halyqaralyq startap-hab qurýdamyz. Onda bizdiń ınnovatsııalyq ortalyqtar jumys isteıdi. Almatydaǵy ınnovatsııalyq tehnologııalar parki de tolyǵymen qaıta qaralady, onyń tujyrymdamasy qaıta jasaldy. Bul jóninde jumys istep jatyrmyz, jaqynda jańa baǵdarlama qabyldanady. Biz álemde bolyp jatqan ózgeristerge qol qýsyryp, qarap otyra almaımyz jáne qoldanýshy bolyp qala almaımyz», - dedi Baqytjan Saǵyntaev.