Oqýshylar dene tərbıesi pəniniń muǵalimi urdy dep shaǵymdandy - OQO
ASTANA. QazAqparat - Ońtústik Qazaqstan oblysynyń joǵary synyp oqýshylary dene tárbıesi pániniń muǵalimi sabaq ústinde qol kóteredi degen shaǵymmen prokýratýraǵa júgindi, dep habarlaıdy TVK.
Oblystyń bas prokýrory Ibrahım Imanovqa joldanǵan anonımdi hatta burynǵy boksshy, qazirgi dene tárbıesi pániniń muǵaliminiń sabaq saıyn balalarǵa kúsh qoldanatyny jazylǵan. Shaǵym Maqtaaral aýdanynyń prokýratýrasyna jiberildi. Prokýror 28 sáýirge deıin istiń mán-jaıyn anyqtap, qorytyndysyn shyǵarýǵa tapsyrma berdi. Oqý mekemesiniń dırektory mundaı qatigez sabaqtar týraly eshteńe bilmegenin aıtýda.
«Mektep dırektory retinde bul jaǵdaı týraly eshteńe bilmeımin. Oqýshylardyń sabaqta jaraqat alǵandary týraly esh málimet joq», - deıdi Segizbaı Janysbaev.
«Biz dene tárbıesinen sabaq beretin muǵalimmen sóılestik, ol balalarǵa kúsh qoldanbaǵanyn aıtty», - dep tolyqtyrdy Maqtaaral aýdany bilim berý bóliminiń ádiskeri Ǵalymjan Saparov.
31 jastaǵy muǵalim bul mektepte 2010 jyldan beri jums isteıdi. Ol eshqashan bokspen aınalyspaǵanyn málimdedi.
«Maǵan taǵylǵan bul aıyptaýlarmen kelispeımin. Meniń boksqa esh qatysym joq, ózimniń sporttyq úıirmem bar, biraq onda toǵyzqumalaq oınaımyz», - dep aqtaldy muǵalim Sábıt Seıitqulov.
Sondaı-aq, aýdandyq bilim berý bólimi janyndaǵy arnaıy komıssııa atalǵan isti tergep jatyr. Shaǵymdy kimniń jazǵany belgisiz, mektep oqýshylary da muǵalim sekildi bul iske qatysy joqtaryn aıtýda.
