Oqýshylar da, ustazdar da Muqaǵalı óleńderin oqydy
ASTANA. QazAqparat - Astana qalasyndaǵy №38 qazaq mektep-lıtseıde qazaqtyń birtýar aqyny Muqaǵalı Maqataevqa arnalǵan ádebı kesh bolyp ótti. Bul aqynnyń týǵan kúnine oraı uıymdastyrylǵan bolatyn.
Mádenı is-shara aqynnyń ómirbaıany men shyǵarmashylyq jolynda qol jetkizgen tabystary týraly shaǵyn beınetaspany tamashalaýdan bastaldy.
Aqıyq aqynnyń sózine jazylǵan ánder oryndaldy. 6 jáne 7 synyp oqýshylarynyń atsalysýymen M.Maqataevtyń dastany boıynsha kórinis kórsetildi. Al 6 jáne 10, 11 synyp oqýshylary aqynnyń jyrlaryn mánerlep oqyp berdi. Hantáńiriniń muzbalaǵy atanǵan aqynnyń ómirsheń óleńderin bilim ordasynyń birqatar ustazdary da oqyp, ádebı keshti tamashalaýǵa jınalǵandardyń qoshemetine bólendi.
Kesh sońynda №38 mektep-lıtseıdiń bastaýysh synyptar oqý isiniń meńgerýshisi jáne qazaq tili men ádebıeti pániniń oqytýshysy Shynar Qarjaýbaıqyzy sóz sóılep, jas urpaqtyń boıyna ulttyq qundylyqtardy sińirýde mundaı poezııa keshiniń mańyzdylyǵyn atap ótti. Bilimmen birge rýhanı baılyqty azyq etken oqýshylar el senimin aqtaıtyn azamattar bolyp qalyptasatyny anyq.
«Muqaǵalı Maqataev óz óleńinde úsh baqytym bar dep aıtqandaı, birinshi baqytym halqym dese, búginde týǵan halqy ony eske alyp, rýhyna taǵzym etýde. «Al ekinshi baqytym - Tilim meniń» degenindeı, ana tilimiz máńgilik til bolyp jatyr. Aqyn týǵan Otanyn úshinshi baqytym dep ataǵany belgili. Mine, búgingi tańda bizdiń Otanymyz - Qazaq eli jyldan jylǵa damyp, álemdik qoǵamdastyqta laıyqty ornyn alyp otyr. Táýelsiz memleketimizdiń bolashaǵy - osy bizdiń oqýshylar. Elimizdi alǵa bastyratyndar da sizdersizder»,- dedi Shynar Qarjaýbaıqyzy.
Bul sharany ustazdarmen, oqýshylarmen birlese otyryp, mektep ákimshiligi uıymdastyrdy.
Aıta ketý kerek, Jamal Bazarqulqyzy Qasymbek basshylyq jasaıtyn ujymda tájirıbeli muǵalimder jumys isteıdi. Daryndy balalarmen jumys isteý isi óte jaqsy jolǵa qoıylǵan. Sonymen qatar 5-synyptan bastap 11-synyptyń aralyǵyndaǵy oqýshylar ǵylymı jumystarmen aınalysady. Bilim berýmen qatar oqýshylardyń rýhanı baılyǵyn arttyrý maqsatynda osyndaı ádebı-mádenı keshter de jıi ótip turady.
