Oqýshylar da mektepke Ashyq qosymshasymen kire me – mınıstr jaýaby

NUR-SULTAN. QazAqparat – Ashyq qosymshasy mektepterde qalaı qoldanylady? Bul saýalǵa QR Bilim jáne ǵylym mınıstri Ashat Aımaǵambetov jaýap berdi, dep habarlaıdy QazAqparat tilshisi.

«Ashyq júıesimen qamtamasyz etýge qatysty suraqtar bar. Bul qosymshany mektepte kim qoldanady? Qoldanýshylar: qyzmetkerler, muǵalimder, al balabaqshalarda balany alyp kelýshiler bolýy múmkin. Bul is-shara eń aldymen úlkenderge baǵyttalǵan. Ýnıversıtetterde stýdentter tekseriledi. Ázirshe oqýshylar jaıynda sóz qozǵap otyrǵanymyz joq. Eresekterdi qamtý qajettigin túsinemiz, ári qaraı da nazarda ustaımyz», - dedi Ashat Aımaǵambetov Tengrinews.kz aqparattyq portalyna bergen suhbatynda.

Onyń atap ótýinshe, oqýshynyń, stýdenttiń ata-anasy nemese bilim alýshynyń ózi aýyryp qalsa, onda odan aýrýdyń klınıkalyq belgileri men sımptomdary baıqalmasa da bilim ordasyna kirgizilmeıdi. Al bilim alýshynyń synyptastary nemese stýdenttiń bir toptaǵy kýrstastary tolyqtaı qashyqtan oqý formatyna kóshiriledi.