Oqýshylar Astanany zerttep jatyr
ASTANA. 31 shilde. QazAqparat - Qazaqstannyń túkpir-túkpirinen júzdegen oqýshy Qazaqstan Respýblıkasy Bilim jáne ǵylym mınıstrligi uıymdastyrǵan «Otanymyzdyń elordasy - Astanany zertteımiz» respýblıkalyq ólketaný jobasyna qatysýda.
Bul týraly astana.kz saıtynan habarlandy.
Atalmysh jobanyń maqsaty - Otanymyzdyń astanasynyń qurylýy men damý tarıhyn zertteý arqyly Qazaqstan Respýblıkasynyń bolashaq azamatynyń tulǵasyn qalyptastyrý jáne tárbıeleý. Qazirgi ýaqytta Almaty oblysynan 22 oqýshy jazǵy demalystaryn elordada ótkizdi. Olar QR Tuńǵysh Prezıdentiniń murajaıynda, «Astana - Báıterek» monýmentinde, Táýelsizdik saraıynda, Beıbitshilik jáne kelisim saraıynda, Prezıdenttik mádenıet ortalyǵy janyndaǵy murajaıda, «Atameken» etno-memorıaldyq kesheninde, Astana qalasy Oqýshylar saraıynyń ınteraktıvti parkinde boldy. Sondaı-aq, jas meımandar katermen Esil ózenine ekskýrsııaǵa shyqty.
Ekskýrsııa sońynda oqýshylar QR Bilim jáne ǵylym mınıstri Baqytjan Jumaǵulovpen kezdesti.
Joba aıasynda respýblıkamyzdyń túkpir-túkpirinen kelgen 1200 bala jazǵy demalystaryn Astanada ótkizetin bolady. Ólketaný jobasynyń barlyq qatysýshylaryna sertıfıkattar tabys etiledi.
