Oqýshyǵa daýys kótergen aqtaýlyq muǵalimge sógis jarııalandy

AQTAÝ. QazAqparat – Aqtaýda oqýshyǵa daýys kóterip, dóreki sóılegen muǵalim jaýapqa tartyldy, dep habarlaıdy QazAqparat tilshisi.

Aqtaýdaǵy №1 mektepte ustazdyń oqýshyǵa daýys kóterip sóılep jatqan vıdeosy áleýmettik jelide taraǵannan keıin Mańǵystaý oblystyq Bilim basqarmasy qyzmettik tekserý júrgizdi.

Vıdeodaǵy er adam matematıka pániniń pedagogi retinde 2018 jyldyń 8 qańtarynda jumysqa qabyldanǵan.

«Atalǵan oqıǵa boıynsha jınalys ótti. Muǵalim kinásin moıyndap, ata-analardan keshirim surady. Qazaqstan Respýblıkasy Eńbek kodeksiniń 64-baby 2-tarmaǵyna sáıkes muǵalimge «sógis», baqylaýdy álsiretkeni úshin mektep dırektoryna «eskertý» jarııalandy», - dep málim etti Mańǵystaý oblystyq bilim basqarmasynyń baspasóz qyzmetinen.

Mundaı jaǵdaılar qaıtalanbaý úshin óńirdiń bilim berý uıymdaryna qatań eskertý jiberildi.