Oqýshy oqýlyqty mektepke tastap ketip, úıinde elektrondy nusqasymen daıyndala alady
NUR-SULTAN. QazAqparat – Bilim jáne ǵylym mınıstrligi mektep oqýshylaryna osyndaı quqyq berip otyr, dep habarlaıdy QazAqparat tilshisi.
«Oqýlyq máselesine qatysty syndy búgin Memleket basshysy da aıtty. Oqýlyqtarymyzdaǵy qatelikterdiń bolýy – tipti daýly taqyrypqa aınalyp ketti. Sondyqtan, bul rette amal-ádisti túpkilikti ózgertý kerek. Jalpy, biz tujyrymdamany ózgertkeli jatyrmyz. Keıbir áriptesterimiz aıtqandaı, oqýlyq – qosalqy materıal degen pikirge óz basym úzildi-kesildi qarsymyn! Oqýlyq – kómekshi qural bop qalsa, negizgi qural ne bolmaq? Sol sebepti, oqýlyq – bizdiń oqýshylardy daıyndaýda negizgi qural bolyp qala beredi. Bul rette aýqymdy ári keshendi jumysty júrgizetinimizdi aıtqym keledi», - dedi Bilim jáne ǵylym mınıstri Ashat Aımaǵambetov Tamyz konferentsııasynda.
Mınıstr óz sózinde avtorlardyń, sarapshylardyń ózi oqytylatynyn atap ótti. Ashat Aımaǵambetovtyń aıtýynsha, oqýlyqtarǵa qoıylatyn talaptar ázirlenip qoıǵan. Jýyq arada muǵalimder birlestikterimen ol talaptar talqylanbaq.
«Bıyl mınıstrlik «Jeńil portfel» jobasyn júzege asyrady. Ol týraly aıttyq. Biz ata-analarǵa tańdaý berdik. Oqýshy máselen, talap-tilegi bolsa qaǵaz oqýlyqtaryn synypqa, mektepte tastap ketip, úıinde elektrondy oqýlyqpen daıyndala alady. Eń bastysy, mınıstrlik oqýlyqtardyń elektrondy nusqalaryn paıdalanýǵa quqyq beredi. Ary qaraı ata-analary ózderi sheshedi. Sol sekildi jumys dápteri barlyq synyptarǵa mindetti bolmaýy tıis. Pedagogtar ata-analardy jumys dápterin satyp alýǵa mindettemeýi kerek», - dedi Ashat Aımaǵambetov.
