Oqýshy mektepke formasyz kelgen kúnniń ózinde, partaǵa otyrýǵa quqyly - bilim basqarmasy

NUR-SULTAN. QazAqparat – Oqýshy bilim ordasyna arnaıy mektep formasyn kımeı kelmese de, sabaqqa qatysýǵa quqyly. Muny bas qalanyń bilim basqarmasynyń basshysy Qasymhan Senǵazyev aıtty, dep habarlaıdy QazAqparat tilshisi.

«Oqý-aǵartý mınıstrligi bıyl biryńǵaı mektep formasy mindettelmeıtinin málimdedi. Eń bastysy – oqýshy bilim ordasynyń qarapaıym erejelerine saı kıinse bolǵany. Eskerte keteıin, balanyń bilim alý quqyǵyn eshkim shektemeýi kerek. Eger bala mektep formasymen kelmese de, ony ustaz partaǵa otyrǵyzýǵa mindetti», - dedi bilim basqarmasynyń basshysy.

Qasymhan Senǵazyev bul máseleler arnaıy uıymdastyrylatyn keńeste ata-analar komıtetimen talqylanyp, sheshim qabyldanatynyn aıtty.

«Jyl saıyn mektep formasyna qatysty másele qyzý talqylanady. Bala bir mektepten ekinshi mektepke aýysqanda, ata-analar olarǵa forma satyp almaýy kerek ekenin túsinýimiz kerek. Sondyqtan, biz olarǵa qara kók tústi kıim úlgisin usyndyq. Mektep formasy boıynsha sońǵy sheshimdi ata-analar mektep ákimshiligimen birlese otyryp qabyldaıdy», - dep túsindirdi Qasymhan Senǵazyev.

Budan bólek, brıfıng aıasynda bilim basqarmasynyń basshysy astanada úsh aýysymmen isteıtin 4, al bala sany shamadan tys kóp 15 mektep bar ekenin baıandady.