«Oqýshy - mektep - ata-ana» birlesken jumys formaty engizildi - Eraly Toǵjanov

NUR-SULTAN. QazAqparat – Bıyldan bastap mektep pen ata-ananyń tárbıe protsesindegi ózara jaýapkershiligine arnalǵan «oqýshy - mektep - ata-ana» birlesken jumys formaty engizildi.

Bul týraly Senattaǵy jastardy qoldaý taqyrybyna arnalǵan parlamenttik tyńdaýda Premer-Mınıstrdiń orynbasary Eraly Toǵjanov málim etti, dep habarlaıdy QazAqparat tilshisi.

«Jastar – eldiń erteńi, memleketimizdiń tiregi ekeni sózsiz. Qazaqstan halqynyń 20%-yn jastar quraıdy. Memleket basshysy Qasym-Jomart Kemelulynyń «Jańa Qazaqstan» qurý ıdeıasyn júzege asyrýda jastardyń orny erekshe. Sondyqtan Úkimet jastarymyzdyń jan-jaqty damýyna jaǵdaı jasaý boıynsha keshendi jumystardy iske asyrýda. Birinshiden, basty basymdyq jas urpaqtyń básekege qabiletti bolýyna jol ashatyn sapaly bilim berý. Bul rette bilim uıymdarynda oqytýmen qatar tárbıeniń róline asa mán berilýde. Osy maqsatta bıyldan bastap mektep pen ata-ananyń tárbıe protsesindegi ózara jaýapkershiligine arnalǵan «oqýshy - mektep - ata-ana» birlesken jumys formaty engizildi. Bul ata-analar qaýymdastyǵyn mekteptegi tárbıe isine kóptep tartýǵa baǵyttalǵan (ata-analar konsılıýmy, akademııasy)», - dedi E. Toǵjanov.

Budan buryn habarlanǵandaı, Senat tóraǵasy M. Áshimbaev barlyq reformanyń túpki maqsaty jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti.

Sonymen qatar ol ýnıversıtet bitirgen túlekterge eńbek naryǵynda suranys joq ekenin aıtty.