Oqýshynyń elektrondy kúndeliktegi deregi qalaı qorǵalady
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Úkimet otyrysynan keıin ótken baspasóz máslıhatynda «Kúndelik», «BilimClass» sııaqty aqparat júıelerindegi bala deregi qanshalyqty qorǵalǵanyn aıtty.
«Naryqta osyndaı jekemenshikte aqparat kóp bolsa, báseke ulǵaıady. Aqparattyq qaýipsizdik sertıfıkatsııasynan ótýi kerek. Bilimge qatysty platformalar nemese T.Týrlovtyń platformasy, bulardyń bári úlken ınvestorlar, naryqta bar», – dedi mınıstr jýrnalıst suraǵyna bergen jaýapta.
Vedomstvo basshysy atalǵan platformalar ýaqyt synynan abyroımen ótti dep sanaıdy.
«Olardyń sol nátıjeleri joǵary deńgeıde ekenin biz kórdik. Jańa platformalardy qazir talqylaı almaımyn: Óıtkeni olarǵa áli analız jasaǵan joqpyn», – dedi Jaslan Mádıev.