Oqýshynyń áskerı qyzmetke degen túsinigi mektepte qalyptasýy tıis – Albert Bekmuhanov
ASTANA. KAZINFORM – Oqýshylardyń áskerı qyzmetke degen alǵashqy túsinigin mektep tabaldyryǵynda qalyptastyrý maqsatynda Qazaqstandaǵy bilim ordalarynda alǵashqy áskerı daıyndyq pániniń jańa standarty engizildi.
– Qorǵanys mınıstrliginiń basty maqsaty – áskerı qyzmetke degen kózqarasty mektep kezinen qalyptastyrý. Pánniń ataýy 2017 jyly ózgertilgenimen, qazirgi bastapqy áskerı daıyndyq sabaǵynyń baǵdarlamasynda eshqandaı ózgeris joq. Tek sabaqtyń qurylymyna basymdyq berilgen: jalpy 34 saǵattyń 17 saǵaty tikeleı bastapqy áskerı daıyndyq sabaqtaryna baǵyttalǵan. Kez kelgen adam teorııalyq turǵydan alǵan bilimin praktıkalyq, ıaǵnı oqý-dalalyq, lagerlik jıyndar barysynda qalyptastyrady. Osy arqyly oqýshylardyń áskerı qyzmetke degen alǵashqy túsinigi mektep tabaldyryǵynda qalyptasýy tıis, - dedi QR QK Bas shtaby Uıymdastyrý-jumyldyrý jumystary departamentiniń baǵyt aǵa ofıtseri Albert Bekmuhanov «Búgin LIVE» baǵdarlamasyna bergen suhbatynda.
Jańartylǵan qaǵıdalarda Qarýly kúshterdiń oqý protsesine qatysýy kúsheıtiledi. Baǵdarlamada oqý-dalalyq sabaqtar kóbeıip, áskerı qyzmetshiniń quqyqtary men áleýmettik kepildikteri týraly praktıkalyq túsindirýler engizildi.
– Qorǵanys mınıstrligi áskerı pán muǵalimderi men bastapqy áskerı daıyndyq oqýshylarynyń teorııalyq jáne praktıkalyq turǵydan alǵan bilimin áskerı qyzmetpen baılanystyrýdy kózdep otyr. Oqý barysynda alynǵan teorııalyq bilim praktıkalyq jıyndarda bekitiledi. Bul bolashaqta áskerı qyzmetke daıyn, túsinigi qalyptasqan jastardy tárbıeleýge múmkindik beredi, - deıdi stýdııa qonaǵy.
Uıymdastyrý-jumyldyrý jumystary departamentiniń baǵyt aǵa ofıtseri jańa talaptar kadr máselesine áser etpeıtinin aıtady.
– Jańa talaptardyń engizilýi kadr tapshylyǵyn týyndatpaıdy. Sebebi burynnan jumys istep kele jatqan bastapqy áskerı daıyndyq muǵalimderi óz qyzmetin ári qaraı atqara beredi. Al aldaǵy ýaqytta bul laýazymǵa áskerı qyzmetten ótken azamattar ǵana taǵaıyndalýy tıis. Bul ózgerister men tolyqtyrýlardyń basty sebebi – áskerı ómirdi óz kózimen kórgen pán muǵalimderi ǵana oqýshylardy áskerı qyzmetke durys baǵyttap, olardyń qorqynyshyn joıa alady. ıAǵnı, áskerı tájirıbesi bar maman balalarǵa áskerı ómirdi naqty ári túsinikti túrde úırete alady, - deıdi ol.
Maman áskerı qyzmettiń múmkindikteri men artyqshylyqtaryna da toqtaldy.
– Bárimizge málim, búginde ulttyq ıdeologııalyq turǵyda álsirep jatqan tustarymyz bar. Sondyqtan qazirgi jas azamattardyń áskerı ómirge degen kózqarasyn bir baǵytta qalyptastyrý qajet. Qazaqstan Respýblıkasy Konstıtýtsııasynyń 36-babynda kórsetilgendeı: «Qazaqstan Respýblıkasyn qorǵaý – árbir azamattyń qasıetti boryshy jáne paryzy». Osyǵan sáıkes, jastardyń patrıottyq ynta-jigerin arttyryp, áskerge barýǵa degen kózqarasty mektep qabyrǵasynan qalyptastyrý – basty maqsat. Sonymen qatar halyqtyń kópshiligi áskerı qyzmettiń artyqshylyqtary men múmkindikterin tolyq bile bermeıdi. Qorǵanys mınıstrligi tarapynan áskerı boryshyn ótegen azamattarǵa UBT-syz joǵary oqý ornyna túsý, kredıt boıynsha kanıkýl berý sııaqty birqatar jeńildikter men múmkindikter qarastyrylǵan, - dedi Albert Bekmuhanov.
Eske sala keteıik, Premer-mınıstrdiń orynbasary – Ulttyq ekonomıka mınıstri Serik Jumanǵarın áskerı qyzmetshilerdiń ratsıonyna jylqy eti qashan qosylýy múmkin ekenin aıtty.
