Oqýshyny jezókshelikke májbúrleý: Búgin Qyzylordadaǵy atyshýly iske qatysty sot úkimi shyǵady
QYZYLORDA. KAZINFORM — Qyzylordada 16 jastaǵy qyzdy synyptastary seksýaldy quldyqta ustaǵan oqıǵaǵa qatysty 9 adamǵa sot úkimi shyǵady.
Buǵan deıin atyshýly iske baılanysty aıyptalǵan 5 adam sottalǵan bolatyn. Olardyń arasynda jábirlenýshiniń kámeletke tolmaǵanyn bile tura ony saýnada jezókshelikke tartyp, jeńgetaılyqpen aınalysqandar, bopsalaýshylar men mefedron qabyldaýǵa ıtermelep, jynystyq qatynasqa májbúrlegender bar.
Búgin isi qaralatyn 9 adamnyń 5-i kámeletke tolmaǵan.
Buǵan deıin biz Qyzylorda qalasynyń № 2 sotynda kámeletke tolmaǵandy psıhotroptyq zattardy tutynýǵa kóndirý faktisi boıynsha sottalýshy N.-ǵa qatysty qylmystyq is qaralǵanyn jazǵanbyz. Sot úkimimen sottalýshy QR Qylmystyq kodeksiniń 299-baby 3-bóliginiń 1-tarmaǵy boıynsha kináli dep tanyldy. Oǵan 8 jyl merzimge bas bostandyǵynan aıyrý jazasy taǵaıyndaldy.
Eske sala keteıik, Qyzylordada synyptasyn jezókshelikpen aınalysýǵa májbúrlegen oqýshylar kúdikke ilingenin jazǵan bolatynbyz.
Artynsha Qyzylordada keleńsizdikke jol bergender qyzmetinen ketti.
Keıin QR ІІM jábirlenýshi turatyn aýmaqty táýlik boıy kúzetti.
Ǵanı Beısembaev oqýshyny jezókshelikke májbúrleý daýyna qatysty pikir bildirdi.
Tergeý júrip jatqanda Qyzylordada oqýshyny jezókshelikke májbúrlegen 8 kúdikti qamaldy.
Keıinirek oqýshyny jezókshelikke májbúrleýge qatysty 13 adam anyqtaldy.
Sondaı-aq qarasha aıynda Qyzylordada oqýshyny jezókshelikke májbúrlegen aıyptalýshyǵa úkim kesildi.
Al Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda sottalýshy K.-ǵa qatysty eki qylmystyq is boıynsha sot úkimi shyqty.
Aıta ketsek, oqýshyny jezókshelikke májbúrleý isi boıynsha Qyzylordada jeńgetaılyq faktisine qatysty sot úkimi shyǵaryldy.