Oqýshyny tárbıeleý mindetin oryndamaǵan muǵalimge qylmystyq jazalaý sharasy engizilmek
ASTANA. KAZINFORM – Pedagogterdiń jaýapkershiligine qoıylatyn talaptar qatańdatylmaq. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan.
«Pedagogterdi irikteýge qoıylatyn talaptardy arttyrý maqsatynda «Pedagog mártebesi týraly» Zańda birqatar shekteý qarastyrylǵan. Máselen, sot úkimine sáıkes pedagog qyzmetin júzege asyrý quqyǵynan aıyrylǵan, psıhıatrııalyq, narkologııalyq esepte turǵan, sottylyǵy bar jáne taǵy basqa psıhıkalyq, minez-qulyq buzylystary (aýrýlary) bar adamdar pedagogıkalyq jumysqa qabyldanbaıdy. Budan basqa, «Qazaqstan Respýblıkasynyń keıbir zańnamalyq aktilerine áıelderdiń quqyqtaryn qamtamasyz etý jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasynda pedagog kámeletke tolmaǵandy tárbıeleý jónindegi mindetterdi oryndamaǵany nemese tıisinshe oryndamaǵany úshin ákimshilik jáne qylmystyq jazalaý sharalary (eki myń aılyq eseptik kórsetkishke deıingi mólsherdegi aıyppul, túzeý jumystary, eki jylǵa deıingi merzimge shekteý ne bas bostandyǵynan aıyrý) engiziledi. Pedagogterdiń jaýapkershiligine qoıylatyn talaptardy qatańdatý bilim berý uıymdaryndaǵy balalardy barynsha qorǵaýǵa múmkindik beredi», - dep atap ótedi Úkimet basshysy jaýabynda.
Premer-Mınıstrdiń atap ótýinshe, Memleket basshysynyń tapsyrmasyna oraı qoǵamdyq uıymdardyń, táýelsiz sarapshylardyń qatysýymen qazaqstandyq bilim berý sapasyn arttyrý úshin «Barshaǵa qoljetimdi sapaly bilim berý» Ulttyq baıandamasynyń jobasy ázirlendi.
«Jalpy, ol bilim berý sapasyn baǵalaýdyń ulttyq júıesin engize otyryp, bilim berýdiń barlyq deńgeıiniń sapasyn jaqsartý jónindegi júıeli sharalardy kózdeıdi. Qazirgi ýaqytta Ulttyq baıandamany iske asyrý úshin barlyq óńirlerde mektepter bólinisinde bilim berý sapasyn arttyrý boıynsha Jol kartalary daıyndaldy», - dedi Álıhan Smaıylov.
