Oqýshyny mektep ájethanasynda urǵan: polıtsııa qylmystyq is qozǵady

QYZYLORDA. KAZINFORM – Qyzylorda qalasyndaǵy mektepterdiń birinde oqýshyny jasóspirimder jabylyp urǵan. Mektep ájethanasynyń ishinde bolǵan oqıǵa beınekameraǵa túsip qaldy. Jelide taraǵan vıdeo kópshilik arasynda qyzý talqylandy.  

Ondaǵy aqparatqa sensek, oqýshyny uryp-soǵý deregi 8 qazan kúni tańerteńgi ýaqytta tirkelgen. Densaýlyǵyna zaqym kelgen jábirlenýshi jergilikti aýrýhanaǵa jetkizilip, oǵan ota jasalǵan.

Kazinform tilshisiniń resmı saýalyna baılanysty oblystyq polıtsııa departamenti túsinikteme berdi. 

– Buzaqylyq deregi boıynsha qylmystyq is qozǵaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti sharalar júrgizilip jatyr. Kúdikti retinde kámeletke tolmaǵandar ustalyp, polıtsııaǵa jetkizildi. Sondaı-aq kináli jasóspirimderdiń zańdy ókilderi bala tárbıeleý jónindegi mindetterdi tıisti deńgeıde oryndamaǵany úshin jaýapqa tartylatynyn eske salǵym keledi, - dedi departament bastyǵynyń birinshi orynbasary Serik Toqtybaev.

Vedomstvo ókili qylmystyq isti tergeý barysy departament basshylyǵynyń erekshe baqylaýynda ekenin atap ótti.

Qosymsha shara qabyldaý jáne osyndaı minez-qulyqqa yqpal etetin sebepterdi joıý úshin polıtsııa ákimdik janyndaǵy kámeletke tolmaǵandar isi jónindegi komıssııaǵa usynys joldaǵan. 

Buǵan deıin habarlaǵanymyzdaı, Atyraý qalasyndaǵy aýlalardyń birinde 9 jastaǵy jasóspirimge qatysty jasalǵan zorlyq-zombylyq faktisi boıynsha qylmystyq is qozǵaldy.