Oqýshylarymyz ótken oqý jylynda halyqaralyq olımpıadalarda 1 059 medal jeńip aldy - Súleımenova
ASTANA. KAZINFORM – Qazaqstan oqýshylary ótken oqý jylynda halyqaralyq olımpıadalarda 1 059 medal jeńip aldy. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
- Búginde Qazaqstan halyqaralyq olımpıadalardyń jeńimpazdary men olardy daıyndaǵan pedagogterge memlekettik deńgeıde qoldaý kórsetiletin sanaýly elderdiń biri. 2022 jyldan bastap halyqaralyq zııatkerlik jarystarda elimizdi laıyqty túrde tanytyp júrgen daryndy oqýshylar men olardyń pedagogterin yntalandyrýdyń júıeli tetigi qalyptasty. Atap aıtqanda, olımpıada jeńimpazdaryna medal deńgeıine baılanysty 500-den 1500 aılyq eseptik kórsetkishke deıingi mólsherde birjolǵy syıaqy taǵaıyndaldy, - dedi Juldyz Súleımenova.
Onyń aıtýynsha, 2025-2026 oqý jylynda qazaqstandyq oqýshylar 44 halyqaralyq olımpıadalar men ǵylymı konkýrstarǵa qatysyp, 1 059 medal jáne 57 arnaıy marapatqa ıe boldy. Bul 2023 jylmen salystyrǵanda marapattar sanynyń 96 paıyzǵa óskenin kórsetedi.
- Qazaqstan quramasy robototehnıka boıynsha tórt dúrkin álem chempıony, hımııa boıynsha Halyqaralyq olımpıadanyń úsh dúrkin chempıony, al fızıkada absolıýtti chempıon atandy. Osy jyldyń eń mańyzdy jetistikteriniń biri Kolýmbııada ótken 56-Halyqaralyq fızıka olımpıadasynda tarıhı jeńis boldy. Qazaqstan quramasynyń barlyq bes qatysýshysy altyn medal jeńip alyp, el tarıhynda buryn-sońdy bolmaǵan nátıjege qol jetkizdi, - dedi mınıstr.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
