Oqýshylarǵa qoldaý kórsetilmegen: keshki mektepterge 941 bala aýysyp ketken
ASTANA. KAZINFORM — Búgin Quryltaıda «Qazaqstan balalary» tujyrymdamasynyń iske asyrylýyn talqylaýǵa arnalǵan Úkimet saǵatynda Quryltaı tóraǵasynyń orynbasary Dınara Zákıeva keshki mektepterge qatysty problemany kóterdi.
- Elimizde 40 keshki mektep jumys istep tur. Tekserý barysynda keıbir balalardyń úı sharýasyna kómektesý nemese baýyrlaryna qaraý maqsatynda ata-analarynyń talaby boıynsha keshki mektepke aýystyrylǵan jaǵdaılary anyqtaldy, - dedi Dınara Zákıeva.
Sonymen qatar ol keıbir mektepter balaǵa qajetti qoldaý kórsetýdiń ornyna, «onymen jumys isteý qıyn» dep, keshki mektepke aýystyra salatynyn aıtty. Bul balalardyń qaýipsizdigine qosymsha qaýip tóndiredi.
- Osyǵan baılanysty biz atalǵan máseleni retteıtin buıryqty qabyldaý protsesin jedeldetýdiń mańyzdylyǵyna Oqý-aǵartý mınıstrliginiń nazaryn aýdardyq. Óıtkeni toǵyz aıdyń ózinde keshki mektepterge 941 bala aýystyrylǵan. Negizi buıryq qabyldaý merzimi qyrkúıek edi, endi jaqyn arada qabyldanady dep úmittenemiz, - dedi Quryltaı tóraǵasynyń orynbasary.
Buǵan deıin «Ulttyq qor – balalarǵa baǵdarlamasy aıasynda bıyl 902 mln AQSh dollary aýdarylǵanyn jazǵan edik.