Oqýshylarǵa kásibı baǵyt beretin «Mansap kompasy» tsıfrlyq platforma ázirlenip jatyr

ASTANA. KAZINFORM — «Jaıly mektep» ulttyq jobasy aıasynda oqýshylarǵa kásibı baǵyt beretin «Mansap kompasy» atty arnaıy tsıfrlyq platforma ázirlenip jatyr. Oqý-aǵartý mınıstri Ǵanı Beısembaev «Jaıly mektepterdiń» eń basty erekshelikterin atady.

— Jobanyń negizgi basymdyqtarynyń biri — oqýshylarǵa erte jastan kásibı baǵdar berý. Bastaýysh synyptarda túrli mamandyq ıelerimen kezdesýler, jobalyq aptalar uıymdastyrylady. 7-synyptan bastap tereńdetilgen beıindik oqytý, tálimgerlik júıesi jáne jeke bilim berý kýrstary engiziledi. Bul úderisti tıimdi úılestirý jáne basqarý maqsatynda «Mansap kompasy» atty arnaıy tsıfrlyq platforma ázirlenýde. Platforma oqýshylarǵa bolashaq kásibı baǵytyn jáne ári qaraıǵy bilim berý jolyn sanaly túrde tańdaýǵa kómektesedi. Mektep — bul qazirgi zaman balasynyń qajettiligine tolyq jaýap beretin, tek bilim berip qana qoımaı, ómirlik jol silteıtin jańa býyn keleshek mektep modeli. Ol bilim sapasyn arttyrýǵa, qaýipsiz ári qolaıly orta qurýǵa, balalardyń jan-jaqty damýyna jaǵdaı jasaýǵa baǵyttalǵan júıeli ózgeristerdiń bastaýy bolmaq, — dedi mınıstr Ortalyq kommýnıkatsııalar qyzmetindege brıfıngte.

Onyń aıtýynsha, joba aıasynda barlyq mektepterde ınternet jelisine keminde 100 Megabıt jyldamdyqpen qosylý múmkindigi qamtamasyz etiledi. Mekteptiń ár qabatynda kitap qoımasy, oqý zaldary, medıateka, elektrondy kitaphanalar jáne oqýǵa arnalǵan kovorkıng aımaqtary jeke kitaphanalyq keńistik ornalastyrylǵan. 

— Oqýshylardy eńbekke baýlý jáne shyǵarmashylyq áleýetin damytý maqsatynda mektepterde ámbebap sheberhanalar men stýdııalar, sondaı-aq bastapqy kásibı bilim berýge arnalǵan arnaıy jabdyqtalǵan kabınetter qarastyrylǵan. Atap aıtqanda, tigin, aspazdyq, aqparattyq tehnologııa (ІT), aǵash sheberhanasy jáne basqa da baǵyttar boıynsha oqý bólmeleri qajetti zamanaýı jabdyqtarmen tolyq qamtylǵan, — dedi Ǵanı Beısembaev.

Sondaı-aq Oqý-aǵartý mınıstri «Jaıly mektepterdiń» eń basty erekshelikterin atady.