Oqýshylarǵa qandaı medıtsınalyq kómek tegin kórsetiledi
PETROPAVL. KAZINFORM – Oqý jyly bastalǵaly beri ata-analar balalaryna qandaı tegin medıtsınalyq qyzmetter kórsetiletinin bilgisi keledi. Áleýmettik medıtsınalyq saqtandyrý qory bul suraqqa jaýap berdi.
Oqýshylar MÁMS júıesinde avtomatty túrde saqtandyrylǵan, ıaǵnı olar úshin jarnany memleket tóleıdi. Sondyqtan balalar kepildendirilgen tegin medıtsınalyq kómek kóleminde de, mindetti áleýmettik medıtsınalyq saqtandyrý paketi aıasynda da barlyq qajetti medıtsınalyq qyzmetterdi ala alady.
Oqýshylarǵa mektep medıtsınasy, stomatologııalyq qyzmetter, dárigerlerdiń konsýltatsııalary, zerthanalyq taldaýlar, qural-jabdyq dıagnostıkasy (ÝDZ, rentgen, KT, MRT jáne t.b.), kúndizgi statsıonar, táýlik boıǵy statsıonar, ońaltý qyzmetteri, aýrýlardyń tizimi boıynsha dári-dármekpen qamtamasyz etý, joǵary tehnologııalyq medıtsınalyq kómek qoljetimdi.
«Mektep medıtsınasy» degen ne?
Bul – bilim berý uıymdarynda mektep jáne mektepke deıingi balalarǵa kórsetiletin medıtsınalyq kómek. Oǵan balalardyń densaýlyǵyn qorǵaý men nyǵaıtý, aýrýlardyń aldyn alý jáne olardyń densaýlyq jaǵdaıyn dınamıkalyq baqylaý kiredi.
Mektep medıtsınasyna:
– Aldyn ala medıtsınalyq qaraýlardy júrgizý;
– Oqý jáne demalys ýaqytyndaǵy saýyqtyrý is-sharalary;
– Aýrýlardyń aldyn alý;
– Densaýlyqty nyǵaıtý jáne durys tamaqtanýdy nasıhattaý;
– Reprodýktıvti densaýlyqty qorǵaý;
– Psıhıkalyq densaýlyqty qorǵaý, sýıtsıd, temeki shegý, esirtki men ýly zattarǵa áýestik, oıynǵa táýeldiliktiń aldyn alý;
– Ulttyq ekpe kúntizbesine sáıkes vaktsınatsııa júrgizý;
– Aldyn ala qaraýlar nátıjesi boıynsha oqýshylardy tereń medıtsınalyq tekserýge joldaý;
– Sanıtarlyq erejelerdi saqtaý jatady.
Bul qyzmetter mektep ornalasqan aýmaqtaǵy emhana arqyly kórsetiledi. Mektepterdegi medıtsınalyq qyzmetkerler oqý jyly barysynda balalardy baqylap, ýaqytyly medıtsınalyq kómek kórsetýge múmkindik beredi.
– Keıde bizge ata-analardan balalaryn ruqsatsyz basqa medıtsınalyq uıymǵa tirkep qoıǵany týraly shaǵymdar túsedi. Mundaı pikirdiń paıda bolýyna júıede balanyń basqa emhanadan medıtsınalyq qyzmet alǵany týraly aqparattyń kórinýi. Alaıda is júzinde bul qyzmetti balanyń oqyp jatqan mektebi qaraıtyn emhana kórsetken, - deıdi Áleýmettik medıtsınalyq saqtandyrý qorynyń basqarma tóraǵasynyń orynbasary Indıra Sarkenova.
Esterińizge salaıyq, Prezıdent Densaýlyq saqtaý mınıstrine mindetti medıtsınalyq saqtandyrý júıesin tıimdi etýdi tapsyrǵan edi.