Oqýshylarǵa da SMS-habarlama jiberip jatyr: Balalardyń quqyǵyn qorǵaý komıteti alaıaqtyq týraly eskertti
ASTANA. KAZINFORM - Jańa oqý jyly bastalǵaly beri alaıaqtar balalarǵa qońyraý shalyp, ózin muǵalimmin dep tanystyryp júr, dep habarlaıy QR Oqý-aǵartý mınıstrligi Balalardyń quqyqtaryn qorǵaý komıtetinen.
Komıtettiń habarlaýynsha, «Elektrondyq kúndelikti jańartý» degen syltaýmen olar SMS arqyly kelgen bir rettik qupııa kodtardy suraıdy. Bala ony ata-anasyna nemese mektebine kómektesip jatyrmyn dep oılaýy múmkin. Іs júzinde alaıaqtar osy kodtardy paıdalanyp, «Elektrondyq úkimet» júıesine, onlaın-bankıngke nemese týystarynyń bank shottaryna qol jetkizedi.
Osy rette mınıstrlik SMS-tegi kodtardyń jeke málimet ekenin jáne olardy ata-anadan basqa eshkimge aıtýǵa bolmaıtynyn eskertti.
Balamen áńgimeleskende erekshe mán beretin jaıttar:
* qandaı jaǵdaıda da SMS arqyly kelgen kodtardy eshkimge bermeý;
* qońyraý shalǵan adam ózin muǵalim nemese mektep qyzmetkerimin dese de, birden ata-anasyna habarlasý;
* kúdikti siltemelerge ótpeý, beıtanys qosymshalardy júktemeý.
Ata-analar ne isteı alady:
* balaǵa shynaıy muǵalimder men mektep qyzmetkerleri eshqashan SMS kodtaryn nemese bank kartasynyń derekterin suramaıtynyn túsindirý;
* telefonǵa ata-ana baqylaýyn ornatyp, beımálim nómirlerden keletin qońyraýlardy qadaǵalaý;
* balańyzben senimdi qarym-qatynas ornatyp, osy syndy jaǵdaıdy jasyrmaı aıtýǵa bolatynyn sezdirý.
-Kúdikti áreketter baıqalǵan jaǵdaıda quqyq qorǵaý organdaryna nemese 111 Baılanys ortalyǵyna habarlasýǵa bolady. Balalaryńyzdy qorǵańyzdar — olardyń qaýipsizdigi sizdiń qyraǵylyǵyńyzdan bastalady!, -delingen QR Oqý-aǵartý mınıstrligi Balalardyń quqyqtaryn qorǵaý komıteti taratqan habarlamada.
Osyǵan deıin Qarjylyq monıtorıng agenttigi alaıaqtyqtyń jańa túri týraly eskertken bolatyn.
