Oqýshylarǵa «Birtutas tárbıe» baǵdarlamasy ne úshin kerek

ASTANA. KAZINFORM – Elimizde «Birtutas tárbıe» baǵdarlamasy byltyrdan beri mektep baǵdarlamasyna engizilgen. Baǵdarlamanyń maqsaty jaıly Oqý-aǵartý mınıstri Ǵanı Beısembaev aıtyp berdi.

«Jastardy rýhanı-adamgershilikke tárbıeleý memleket pen jalpy qoǵamdy damytýdyń basym baǵyty. Byltyrdan bastap barlyq bilim berý uıymdarynda «Birtutas tárbıe» baǵdarlamasy engizile bastaǵany belgili. Bıyl naýryzda ótken Ulttyq quryltaıda Memleket basshysy belgilep bergen mindetterge sáıkes atalǵan baǵdarlama jańartyldy», - dedi Ǵanı Beısembaev Úkimet otyrysynda.

Mınıstrdiń málimdeýinshe, jańartylǵan baǵdarlama «Ádiletti Qazaqstan - jaýapty azamat - progressıvti ult» trıadasy sheńberinde adamgershiligi joǵary, adal jáne tabysty tulǵany tárbıeleýge baǵyttalǵan.

«Jańartylǵan baǵdarlama sheńberinde oń qundylyqtar men sapaly quzyretterdi qalyptastyrýǵa baǵyttalǵan bilim berý jáne tárbıe jobalaryn, áleýmettik praktıkalardy iske asyrý jumystary jalǵasady», - deıdi vedomstvo basshysy.

Eske sala keteıik, 2022 jyly Qazaqstanda bilim berý uıymdaryndaǵy birtutas tárbıe berý tujyrymdamasy ázirlenetini belgili boldy.