Oqýshylarǵa arnalǵan jasandy ıntellekt eseptiń daıyn jaýabyn bermeıdi
ASTANA. KAZINFORM – Oqýshylarǵa arnalǵan jasandy ıntellekt oqý tapsyrmalarynyń daıyn jaýabyn bermeı, onyń ornyna sheshý jolyn túsindirip, balany jaýapty óz betinshe tabýǵa baǵyttaýy kerek. Bul týraly BIZDIÑ ORTA podkastynda WONK bilim berý AI-platformasynyń CEO-sy Ersaıyn Bekbolatov aıtty.
Onyń sózinshe, mundaı tásil bala jasandy ıntellektini óz betinshe jumys isteýden jaltarýdyń joly emes, bilim alýǵa kómektesetin qural retinde paıdalanýy úshin arnaıy engizilgen.
– Biz júıeni tipti «2+2» degen suraqqa da daıyn jaýap bermeıtindeı etip jasadyq. Bul ne úshin qajet? Jasandy ıntellektimen durys jumys isteý daǵdysyn qalyptastyrý jáne balanyń óz betinshe damýyna múmkindik berý úshin, – dedi Ersaıyn Bekbolatov.
Onyń aıtýynsha, júıe oqýshyǵa birden nátıjeni kórsetpeıdi. Aldymen tapsyrmany oryndaý qaǵıdatyn túsindirip, sheshimge birge kelýdi usynady.
Osylaısha jasandy ıntellekt oqý barysynda kómekshi ról atqarady, al oqýshy materıaldy ózi túsinip, jaýapty óz betinshe tabýy qajet.
Sonymen qatar jasandy ıntellekt oqytýdy ár oqýshynyń bilim deńgeıine qaraı beıimdeýge múmkindik beredi. Platformada naqty oqýshynyń daıyndyǵyn eskere otyryp tapsyrmalar qurastyrý qarastyrylǵan. Bilim deńgeıi ártúrli balalarǵa kúrdeliligi ártúrli tapsyrmalar beriledi.
Buǵan deıin Ersaıyn Bekbolatov qazaqstandyq WONK bilim berý AI-platformasy elimizdegi 33 mektepte pılottyq synaqtan ótkenin aıtqan. Platforma sabaqqa daıyndalý, sabaq materıaldaryn ázirleý, testileý, oqýshylardy qoldaý, ata-analarǵa arnalǵan servıster jáne mektep ákimshiligine qajetti analıtıkany bir júıege biriktiredi.
Aıta keteıik, birneshe pánnen jyldyq baǵasy «2» bolǵan oqýshy oqý jylyn qaıta oqýǵa qaldyrylady.
