Oqýshylardyń JI salasyndaǵy bilimin jetildirý úshin júıeli sharalar qabyldaý qajet - Prezıdent

ASTANA. KAZINFORM – Memleket basshysy óskeleń urpaqtyń jasandy ıntellektini durys qoldana bilýi mańyzdy ekenin eskertti.

Qasym-Jomart Toqaevtyń aıtýynsha, muny elimizde júrgizilip jatqan tsıfrlyq betburystyń negizgi sharty desek bolady.

– Biz qazirdiń ózinde «AI-Sana» oqytý baǵdarlamasyn júzege asyryp jatyrmyz. Jobanyń maqsaty – stýdentterdiń jasandy ıntellekt salasyndaǵy daǵdysyn jetildirý. Bul baǵdarlamanyń aýqymyn barynsha keńeıte túsken abzal. Ustazdar men oqýshylardyń jasandy ıntellekt salasyndaǵy bilimin jetildirý úshin júıeli sharalar qabyldaý qajet. Bul – tıisti mınıstrliktiń aldynda turǵan mańyzdy mindet, – dedi Prezıdent.

Budan bólek, Memleket basshysy ınvestıtsııa men daryn ıelerine qolaıly jaǵdaı jasaýdyń mańyzyna toqtaldy. 

– Ótken jyly jasandy ıntellekt salasyndaǵy startaptarǵa dúnıe júzi boıynsha 100 mıllıard dollarǵa jýyq ınvestıtsııa salyndy. Bul – álemdegi venchýrlyq qarajattyń úshten bir bóliginen asyp túsedi. 2023 jylmen salystyrǵanda JI jobalaryn qarjylandyrý shamamen 80 paıyzǵa artty. Osylaısha jasandy ıntellekt salasyndaǵy talanttar men ıdeıalarǵa báseke kúrt ósti. Búginde negizgi ınvestıtsııa aǵynyn AQSh, Eýropa Odaǵy elderi jáne Qytaı qamtamasyz etip otyr. Biraq bul qarjy qalyptasqan ekojúıe bar jerge baǵyttalady. ıAǵnı ınfraqurylymǵa qoljetimdilikti qamtamasyz etýge, qoldaýǵa, naryqty retteýge jáne damytýǵa jumsalady. Aqsha jaǵdaı jasalǵan jerge keledi. Bir aı buryn men JI salasyndaǵy birqatar qazaqstandyq startappen tanystym. Olardyń keıbiri álemdik deńgeıge shyǵa alady. Daryndy jastarymyzdyń bar ekeni qýantady. Olardyń birazy shetelde jumys istese de, otanshyldyq sezimin joǵaltpaǵan. Memleket mundaı talant ıelerin qoldaýǵa mindetti, – dedi Qasym-Jomart Toqaev.

Prezıdent Úkimetke otandyq startaptardyń eksportqa shyǵýyna qoldaý kórsetý úshin keshendi sharalar ázirleý, sondaı-aq «tsıfrlyq elshiler» ınstıtýtyn qaıta qaraý mindetin júktedi. 

– Bizdiń mindetimiz – qarym-qabileti joǵary jastarǵa qolaıly ınnovatsııalyq ekojúıe qalyptastyrý. Jalpy aıtqanda, olarǵa barlyq jaǵdaıdy jasaý, qol ushyn berý. Sondaı-aq tyń bastamalardy jedel júzege asyrýǵa yqpal etetin qurylymdar men zertteý ortalyqtaryn ashý kerek. Tsıfrlyq tehnologııa salasyndaǵy halyqaralyq baılanystardy nyǵaıta túsken jón. Sonda ǵana Qazaqstan Eýrazııanyń tsıfrlyq haby retinde tanylmaq. Jasandy ıntellektini damytý – elimiz úshin strategııalyq máni aıryqsha mindet. Bul mindet Qazaqstannyń bolashaǵymen tikeleı baılanysty. Elimiz mindetti túrde ozyq, damyǵan bolýy qajet. Sondyqtan bul másele meniń jeke baqylaýymda bolady. Búgingi jıynda birqatar mańyzdy mindetterdi aıqyndadyq. Barlyq memlekettik organdar men mekemeler birlesip jumys isteýi kerek. Bul jumysqa jeke sektor ókilderin de qosý kerek. Sebebi, bul – jalpyulttyq maqsat. Tsıfrlyq damý mınıstrligi basty úılestirýshi organ retinde ózara baılanysty qamtamasyz etýge tıis. Ýaqyt óte tyǵyz, toqmeıilsip otyrýǵa bolmaıdy. Jasandy ıntellektige qatysty negizgi sheshimder men usynystardy eki aıdyń ishinde daıyndap, maǵan kórsetý qajet, – dep qorytyndylady sózin Qasym-Jomart Toqaev.

Aıta keteıik, Memleket basshysy jasandy ıntellektini damytý máseleleri jóninde keńes ótkizdi.