Oqýshylardyń jazǵy demalysy: ortalyqtarǵa polıtsııa ınspektorlary bekitildi
ASTANA. KAZINFORM – Jazǵy demalysty uıymdastyrý jumystaryna 120 myń pedagog-uıymdastyrýshy, sondaı-aq 12 myńnan astam stýdent pen volonter tartylady. Bul týraly Úkimet otyrysynda QR Oqý-aǵartý mınıstri Juldyz Súleımenova málim etti.
Kelesi másele – balalardyń jazǵy demalysyn, saýyqtyrylýyn jáne bos ýaqytyn tıimdi uıymdastyrý.
- Premer-mınıstrdiń orynbasary - Mádenıet jáne aqparat mınıstri Balaeva Aıda Ǵalymqyzynyń tóraǵalyǵymen oqýshylardyń jazǵy demalysyn mazmundy ári qaýipsiz uıymdastyrý máseleleri boıynsha respýblıkalyq shtab quryldy. Shtab otyrysynda naqty tapsyrmalar berilip, tıisti sharalar qabyldandy, - dedi J. Súleımenova.
Atap aıtqanda, jergilikti atqarýshy organdarmen birlesip, menshik túrine qaramastan barlyq bilim berý – saýyqtyrý ortalyqtarynyń qyzmeti sapaly úılestirilip, baqylaýǵa alyndy. Josparly kórsetkishterge sáıkes balalardy, sonyń ishinde áleýmettik sanattaǵy jáne erekshe qajettiligi bar balalardy jazǵy demalys jáne saýyqtyrýmen qamtýǵa basymdyq berildi. Budan bólek, «Samuryq-Qazyna» ulttyq ál-aýqat qory arqyly 27 700 balaǵa demalys uıymdastyrý máselesi sheshildi. Qaýipsizdikti qamtamasyz etý maqsatynda qalyptasqan tájirıbe negizinde barlyq demalys ortalyqtaryna polıtsııa ınspektorlary bekitildi.
- Bıylǵy jyldan bastap, jyl boıy jumys isteıtin jáne maýsymdyq demalys ortalyqtarynyń qyzmeti lıtsenzııalaý arqyly retteledi. Osyǵan oraı normatıvtik quqyqtyq aktilerdi sáıkestendirý jumystary júrgizililip, qaıta bekitildi. Bul rette Mınıstrlik demalys ortalyqtarynyń ashylý ýaqytyna baılanysty lıtsenzııalaýdy ret-retimen engizý boıynsha túsindirme jumystaryn júrgizdi. Óz kezeginde óńirlik shtab qyzmetiniń aıasynda ákimdikter múddeli memlekettik organdarmen birlesip bilim berý–saýyqtyrý ortalyqtaryna ádistemelik qoldaý kórsetip jatyr. Balalardyń jazǵy demalysyn uıymdastyrý jónindegi 2024-2026 jyldarǵa arnalǵan vedomstvoaralyq jospardyń barlyq is-sharalary tolyq oryndalyp jatyr, óńirlik shtabtardyń jumysy úılestirilgen. Alǵash ret «Bilim berý uıymdarynda balalardyń saýyqtyrylýy men demalysyn uıymdastyrý qaǵıdalary» bekitildi. Qaǵıdalarǵa sáıkes saýyqtyrý ortalyqtarynyń jazǵy maýsymǵa daıyndyǵyn tekserip, qabyldap alýǵa múddeli memlekettik organdar birlesip qatysady (SES, tótenshe jaǵdaı, polıtsııa, ákimdik, bilim basqarmasy, DOKSO), - dedi mınıstr.
Buǵan qosa, demalys ortalyqtarynda jumys isteıtin mamandardyń sapalyq quramyna mán berilgen, árbir qyzmetkerdiń sottylyǵy tekseriledi. Mamandardyń biliktiligin arttyrý úshin kýrstar men semınarlar uıymdastyrylǵan («Baldáýren», «Bóbek» ortalyqtary). Jazǵy demalysty uıymdastyrý jumystaryna 120 myń pedagog-uıymdastyrýshy, sondaı-aq 12 myńnan astam stýdent pen volonter tartylady.
- Balalardyń jazǵy demalysyn qaýipsiz ári sapaly uıymdastyrý maqsatynda keri baılanys jáne jedel kómek kórsetý tetikteri de kúsheıtildi. Atap aıtqanda, bilim basqarmalarynyń janynan qurylǵan koll-ortalyqtar jazǵy demalysqa qatysty azamattardyń ótinishteri men suraqtaryn qaraıdy. Sonymen qatar, «111» baılanys ortalyǵy jazǵy kezeńde kúsheıtilgen rejımde jumys isteıtin bolady. Barlyq bilim berý uıymdarynda balalardyń tikeleı kómek suraýyna arnalǵan QR-kodtar ornalastyrylǵan, - dedi vedomstvo basshysy.
Aıta keteıik, 25 mamyrda el mektepterinde 2025-2026 oqý jyly aıaqtaldy.
