Oqýshylardyń jappaı ýlanýy: mektep ashanasynyń tenderin 9 jyl boıy bir kásipker utyp kelgen
AQTAÝ. KAZINFORM – Mańǵystaý oblysynda oqýshylar astan ýlanǵan mektep ashanasynyń as mázirine qatysty ata-analar tarapynan buǵan deıin de shaǵym bolǵan. Bul týraly agenttik tilshisine balalardyń ata-anasy aıtyp berdi.
Ata-analardyń aıtýynsha, balalardyń basym bóligi ashanada jegen tamaqtyń jaǵymsyz dámine shaǵymdanǵan.
«Balam qatty qyzýlap jatyr eken. Júregim aınyp, qusqym keledi dedi. Sol-aq eken ishken-jegenin shyǵaryp tastady. Tańǵy mezgil, balama dári aldyrttym. Ýlandy dep oılaǵan joqpyn. Keıin balam kúndiz mektepte ashyǵan pıýre jegenin aıtty», - deıdi aýyl turǵyny Aıman Bekqaraeva.
Mańǵystaý oblystyq Densaýlyq saqtaý basqarmasy basshysynyń aıtýynsha, balalar aýrýhanaǵa túsken kezde taǵamdyq toksıkalyq belgilermen kelgen.
«Іsh aýrýy, qusý, júrek aınýy jáne ish ótý belgilerimen túsken. Oqýshylardyń barlyǵy konservatıvti em qabyldap jatyr», - deıdi basqarma basshysy Bekbolat Іzbasarov.
Besshoqy aýylynyń taǵy bir turǵyny Maral Jaqsybekovanyń eki birdeı balasy aýyryp qalǵan. Ekeýi de mektep ashanasynda berilgen tegin tamaqtan ýlanǵan. Qazir dáriger taǵaıyndaǵan dári-dármektermen emdelip jatyr. Alǵashqy eki kúnde qatty álsiregen balalarynyń qazir beti beri qaraǵan.
«Byltyr aýdan ákimine osy kásipkerdiń bylyqtaryn dálelmen kórsetkenbiz. Soǵan qaramastan bıyl taǵy sony alypty. Nege bir jeke kásipkerdi qaıta-qaıta qoıyp otyr?» - deıdi Maral Jaqsybekova.
Mektep dırektory Toılybaı Aımaǵanbetovtyń aıtýynsha, ashanany 9 jyldan beri bir kásipker júrgizip keledi. Bıylǵy baıqaýda da sol utyp, 3 jylǵa kelisimshart jasalǵan.
«Meniń dırektor bolǵanyma 2 jyl boldy. Kásipker 9 jyldan beri meniń aldymdaǵy basshylarmen de jumystas bolǵan. 3 jyl saıyn konkýrs tenderge túsip, ózi jeńip alyp kele jatyr. Bıylǵy baıqaýǵa úsh jeke kásipker qatysqan bolatyn. Osy «Shakenova D» jeke kásipker taǵy da utty», - deıdi mektep dırektory.
Eske salaıyq, 6 qyrkúıek kúni Munaıly aýdany Besshoqy aýylynda №8 mekteptiń bastaýysh synyptarynda oqıtyn oqýshylar astan ýlanyp qaldy.
Keıin 460 bala dárigerlerdiń baqylaýyna alynǵany, onyń 83-i aýrýhanaǵa jatqyzylǵany, 2 bala jansaqtaý bóliminde ekeni habarlandy.
Oblystyq sanıtarlyq-epıdemıologııalyq qadaǵalaý departamentiniń qyzmetkerleri ashanadaǵy taǵamdardan tıisti synamalar alyp, ashana ýaqytsha jabyldy. Al Mańǵystaý oblystyq Sanıtarııalyq-epıdemıologııalyq baqylaý departamenti taǵy qosymsha synama alynǵanyn habarlady. Soǵan oraı, synamalardyń naqty nátıjesi aldaǵy juma kúni belgili bolmaq.
Osy oqıǵaǵa qatysty qylmystyq isti birlesken jumys toby tergep jatyr. Onyń quramynda polıtsııa, ekonomıkalyq tergeý departamenti men prokýratýra qyzmetkerleri bar.
Búgin Úkimet otyrysynan keıingi brıfıngte Oqý-aǵartý mınıstri Ǵanı Beısembaev balalardyń ýlanýyna jol bergender jazaǵa tartylatynyn málim etti.
