Oqýshylardyń ýlanýy: Epıdemıologter ónimdi birneshe dúkennen satyp alyp, zerttep jatyr

AQTÓBE. KAZINFORM – Aqtóbede epıdemıologter oqýshylar ýlanǵan ónimdi taǵy birneshe dúkennen satyp aldy. Qazir zertteý júrgizip jatyr.

Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanovanyń aıtýynsha, búginde 219 dúkenge monıtorıng jasaldy. Oqýshylar ýlanǵan ónim 3 saýda ornynan alyndy. 

— Qazir mıkrobıologııalyq jáne sanıtarly-hımııalyq zertteý júrgizilip jatyr. Nátıjesi boıynsha qosymsha habarlanady. Oqýshylar 19-20 aqpan kúnderi úılerine shyǵaryldy. Olarǵa tynys alý joldary arqyly ýlaný dıagnozy qoıyldy, — dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanova. 

Aqtóbe oblystyq PD baspasóz qyzmetiniń habarlaýynsha, Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha is qozǵaldy. Santsııa boıynsha belgili bir laýazymdardy atqarý nemese belgili bir qyzmetpen aınalysý quqyǵynan 3 jylǵa deıingi merzimge aıyra otyryp, 5 myń AEK deıingi mólsherde aıyppul salynady, bolmasa 1200 saǵatqa deıingi merzimge qoǵamdyq jumystarǵa tartylady. Tipti 5 jylǵa deıingi merzimge bas bostandyǵyn shekteý, bas bostandyǵynan aıyrý jazasy qarastyrylǵan.

Eske salsaq, 18 aqpan kúni oqýshylar ýlandy. 

Balalardyń biri dúkennen qytaısha jazylǵan ónimdi satyp alyp, synyp ishinde bólip bergeni belgili boldy. Olardyń kózi jasaýrap, denesine bórtpe shyqqan.

Tekserý kezinde dúken ıesinde ónim sertıfıkaty bolmaǵany anyqtaldy.

Al keshe balalardyń bári aýrýhanadan shyqty.