Oqýshylardyń ýlanýy: Dúken ıesinde ónim sertıfıkaty bolmady

AQTÓBE. KAZINFORM – Aqtóbede epıdemıologter tekserý júrgizip jatyr. Dúken ıesinde arnaıy qujaty bolmady, ónimde tehnıkalyq reglamentterge sáıkes tańbalary joq.

Aqtóbe oblystyq sanıtarııalyq-epıdemologııalyq baqylaý departamentine habarlama 18 aqpan kúni saǵat 17:28–de túsken. Epıdemıologterge tótenshe jaǵdaılar qyzmetiniń kezekshi bólimi habar berdi. 

— Sol kúni 4 «B» synyp oqýshysynyń Qobda aýdanynda ornalasqan dúkennen belgisiz ónimdi satyp alǵany anyqtaldy. Bastaýysh synyp oqýshylary 18 aqpan kúni mektep ashanasynda tamaqtanbaǵan, ıaǵnı bul oqıǵanyń bilim ordasyndaǵy as bólmesine qatysy joq. Departamenttiń bólim mamandary Qobda aýdanynda ornalasqan dúkenge tergep-tekserý júrgizdi. Atalǵan ónimderdi rastaıtyn qujattary usynylmady, tehnıkalyq reglamentterge sáıkes tańbalary joq. Mundaı jaǵdaı turǵyndar arasynda qaıtalanbas úshin túsindirme jumysy kúsheıtilip jatyr. Oblysta 45 saýda orny baqylaý maqsatynda qaraldy. Onyń ishinde 2 saýda ornynan atalǵan ónimniń satylymda bolǵany anyqtalyp, satyp alyndy. Zerthanalyq zertteý júrgizýge joldandy. Bul baǵytta jumystar jalǵasady, — dep habarlady Aqtóbe oblystyq sanıtarııalyq-epıdemologııalyq baqylaý departamentiniń baspasóz qyzmeti.

Eske salsaq, keshe Aqtóbe oblysy Qobda aýdanynda oqýshylardyń táttiden ýlanǵany aıtyldy. Alǵashqy kúni aýrýhanaǵa 23 bala tústi. Bári bir synyptyń oqýshysy.

Qobylandy batyr atyndaǵy orta mekteptegi ýlaný dereginen soń aýrýhanaǵa bir emes, birneshe dáriger jiberilgen. Polıtsııa tergeý júrgizip jatyr.