Oqýshylardyń ýlanýy: Aqtóbede epıdemıolog mamandar zertteý qorytyndysyn shyǵardy

AQTÓBE. KAZINFORM — Qobda aýdanyndaǵy oqýshylardyń ýlaný dereginen soń birneshe zertteý júrgizildi. Epıdemıolog mamandar ónim quramynan aýyr metall men zııandy bakterııalar tappady.

Aqtóbe oblystyq sanıtarııalyq-epıdemıologııalyq baqylaý departamenti eki zertteý qorytyndysyn shyǵardy. Onyń biri — sanıtarlyq-hımııalyq zertteý. Ol kezde ónim quramynda aýyr metaldyń bar-joǵy tekserildi. Zertteý qorytyndysyna súıensek, ónimnen qorǵasyn, kadmıı̆, myshıak anyqtalmady. 

— Tamaq ónimderin mıkrobıologııalyq zertteý hattamasyna sáıkes mezofıldi aerobty jáne fakýltatıvti anaerobty mıkroaǵzalar, ishek taıaqshasy tobyndaǵy bakterııalar, patogendi flora, sonyń ishinde salmonella, óńez mıkroorganızmderi, GTA (genetıkalyq túrlendirilgen aǵza) tabylmady, — dep habarlady departamenttiń baspasóz qyzmeti.

Qobda aýdanynda oqýshylar ýlanǵan soń oblystaǵy saýda oryndarynda baqylaý júrdi. 270 dúkendi qarap shyqqan mamandar úsheýinen ónimdi alyp, zerthanalyq tekserý júrgizdi. 

— Zertteý barysynda ónimniń Keden odaǵynyń tehnıkalyq reglamentter talaptaryna, ıaǵnı tańbalanýy boıynsha ónimniń ataýy, quramy, jaramdylyq merzimi, saqtaý jáne qoldaný sharalary, qundylyǵy memlekettik jáne orys tilderinde kórsetilmegendigi anyqtaldy. Sáıkes kelmegen ónimder boıynsha sýbektilerge sórelerden alyp qoıý jáne keri qaıtarý týraly Aqtóbe qalalyq bas memlekettik sanıtarııalyq dárigeriniń 3 qaýlysy berildi. Qaýly negizinde satylymda bolǵan 16 ónim alyndy, — dep habarlady Aqtóbe oblystyq sanıtarııalyq-epıdemıologııalyq baqylaý departamentiniń baspasóz qyzmeti.

Eske salsaq, 18 aqpan kúni oqýshylar ýlandy. https://kaz.inform.kz/news/aktobede-okushilar-tattden-ulandi-87b903/ Balalardyń biri dúkennen qytaısha jazylǵan ónimdi satyp alyp, synyp ishinde bólip bergeni belgili boldy. Olardyń kózi jasaýrap, denesine bórtpe shyqqan. Tekserý kezinde dúken ıesinde ónim sertıfıkaty bolmaǵany anyqtaldy.