Oqýshylardyń minez-qulyq mádenıeti jańa KPI arqyly baǵalanady – Juldyz Súleımenova
ASTANA. KAZINFORM – Jańa oqý jylynan bastap mektepterde oqýshylardyń minez-qulyq mádenıeti, aınaladaǵylarǵa qurmeti jáne qarym-qatynas daǵdylary jańa negizgi kórsetkishter júıesi – KPI arqyly baǵalanady. Bul týraly Oqý-aǵartý mınıstri Juldyz Súleımenova Astanada ótip jatqan Tamyz konferentsııasynda málimdedi.
Mınıstrdiń aıtýynsha, Prezıdent Qasym-Jomart Toqaevtyń qoǵamdaǵy jańa etıkalyq baǵdarlardy qalyptastyrý jónindegi tapsyrmasy tárbıe jumysynyń mańyzdy baǵytyna aınalady.
Minez-qulyq normalary men qoǵamdyq mádenıet «Adal azamat» baǵdarlamasy aıasynda balabaqshadan bastap mektep bitirgenshe júıeli túrde qalyptastyrylmaq.
– Jańa oqý jylynan bastap oqýshylarǵa arnaıy sabaqtar ótkiziledi. Júris-turys mádenıeti, aınalaǵa qurmet kórsetý jáne qarym-qatynas daǵdylaryn damytý – jańa KPI bóligine aınalady, – dedi Juldyz Súleımenova.
Sonymen birge, ekologııalyq mádenıetti qalyptastyrýǵa da basymdyq beriledi. «Taza Qazaqstan» tujyrymdamasy aıasynda 2026 jyldyń sońyna deıin ekologııalyq aǵartý jumystarynyń biryńǵaı standarty engiziledi.
Al «Jasyl mektep» jobasy balalardyń tabıǵatqa jáne jalpy qorshaǵan ortaǵa jaýapkershilikpen qaraýyn qalyptastyrýǵa baǵyttalady.
Mınıstr bala qaýipsizdigi men onyń psıhologııalyq ál-aýqaty – bilim berý júıesiniń basty basymdyǵy ekenin atap ótti.
– Birinshi jartyjyldyqta jasóspirimder arasyndaǵy qylmys 4 paıyzǵa tómendegen. Al esepte turǵan balalardyń sany 40,5 paıyzǵa azaıǵan. Bizdiń mindetimiz – bilim berip qana qoımaı, qundylyqtardy qalyptastyratyn jáne ár balanyń qaýipsizdigin qamtamasyz etetin mektep qurý, – dedi Juldyz Súleımenova.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy bastaldy. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysyp otyr.
Qazaqstanda 2019 jyldan beri 511 jańa aýyl mektebi salynǵan.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
Sondaı-aq Jańa Konstıtýtsııa bilim berý salasyna jańa mindetter júktep otyr.
