Oqýshylardyń mamandyq tańdaýyna qatysty monıtorıng bastaldy
ASTANA. KAZINFORM – Y. Altynsarın atyndaǵy Ulttyq bilim akademııasy el mektepterinde kásiptik baǵdar berý júıesine keshendi monıtorıng júrgizedi.
Monıtorıngtiń basty maqsaty oqýshylarǵa kórsetiletin kásiptik baǵdarlaý jumysynyń tıimdiligin baǵalaý jáne onyń olardyń bolashaq bilim berý baǵytyn tańdaýǵa naqty áserin anyqtaý. Zertteý qorytyndysy mektepter arasyndaǵy aıyrmashylyqtardy kórsetetin salystyrmaly derekter qalyptastyrýǵa múmkindik beredi.
Monıtorıng eki baǵyt boıynsha júzege asyrylady:
Birinshi baǵyttaǵy jumys «Keleshek mektepteri» jelisindegi bilim berý uıymdaryn qamtıdy. Bul mektepterde 7-9 synyp oqýshylary «Smart Bolashaq» korporatıvtik qorynyń tsıfrlyq platformasy arqyly testileýden ótedi. Testileý olardyń qabileti men beıimin anyqtaýǵa baǵyttalǵan. Oqýshylar testileýdi uıaly telefon arqyly da tapsyra alady, al uıymdastyrý-tehnıkalyq súıemeldeý tegin qamtamasyz etiledi.
Sonymen qatar 7-9 synyp oqýshylarynyń ata-analary arasynda saýalnama júrgizilip, olardyń kásiptik baǵdar berý júıesi týraly habardarlyǵy men bul úderiske qatysý deńgeıi baǵalanady.
Ekinshi baǵyt aýyl mektepterin qamtıdy. Óńirlik irikteme negizinde 8-9 synyp oqýshylary arasynda saýalnama júrgizilip, olardyń kásibı baǵdarǵa qatysty kózqarastary men qajettilikteri zerdelenedi.
Monıtorıng nátıjeleri mektepterdegi kásiptik baǵdar berý júıesin jetildirýge, tıimdi tájirıbelerdi anyqtaýǵa jáne oqýshylardyń sanaly túrde mamandyq tańdaýyna jaǵdaı jasaýǵa baǵyttalǵan sheshimder qabyldaýǵa negiz bolmaq.
Aıta ketelik mektepterde bilim sapasyn baǵalaý úshin halyqaralyq zertteý júrgiziletini týraly jazǵan edim.
