Oqýshylardyń ChatGPT-di paıdalanýyn shekteý kerek — depýtat

ASTANA. KAZINFORM — Májilis depýtaty Dáýlet Muqaev mektep oqýshylaryna jasandy ıntellektini paıdalanýǵa shekteý engizýdi usyndy.

— Árıne, tehnologııanyń damyǵany jaqsy ǵoı, biraq ýaqyt óte kele munyń bári mıymyzdyń shektelýine ári onyń oılanbaýyna alyp keletin sekildi. Qazirdiń ózinde mektep oqýshylary arasynda eshqandaı tapsyrmany oryndamaı, jasandy ıntellekt — Chat GPT-ge salyp, tapsyrmanyń barlyǵy osy eken dep otyra beredi. Meniń oıymsha, mektep jasyndaǵy oqýshylarǵa qandaı da bir shekteýler qoıylýy kerek sııaqty, — dedi depýtat Dáýlet Muqaev Parlament Májilisinde JI týraly zań jobasyn talqylaý kezinde.

Onyń paıymynsha, bul shekteýler bolmasa, keıinnen onyń saldary óskeleń urpaq úshin keri áserin tıgizedi.

— Eger shekteý qoıylmasa, erteńgi kúni oqýshylarymyz stýdent bolyp, keıinnen eńbek naryǵyna aralasqan kezde, sonyń zardabyn 20 jyldan keıin kóremiz. Muny elimizge kele jatqan úlken qaýiptiń biri dep sanaımyn. Zań jobasyn jumys tobynda qarastyrý kezinde osy usynysqa mán berý kerek, — dedi depýtat.

Budan buryn habarlanǵandaı, búgin Parlament Májilisinde «Jasandy ıntellekt týraly» zań jobasy men ilespe qujat tanystyryldy. 

Zań jobasy aıasynda dıpfeıkterdi qurý áreketteri úshin qylmystyq jaýapkershilik jazasyn engizý múmkindigi talqylanady.